Tura, April 28, 2026: Garo Hills-o ramarangko tarina, nokrangko rikna aro dingtang dingtang kamrangko ka·na 50% percent-kode joltangni manderangkon jakkalna nanga ine Robibar salo, Tura-ni MDC Bernard N Marak didiataha.

Marak-ni parakatani gitade, Garo Hills-o 80% percent-mang chadamberang, kamgri dongenggiparangoni 60% percent-mangni gitade, janggi tangani cholrang dongjae, poraianiko dontonggiparang dongani gimin, uandakgipa chadamberangna, dingtang dingtang kamrangko ka·na gita cholrangko on·na nanga. Mongsonggipa Scheme-rang, jekai Gati Shakti, PMGSY, JJM, PWD aro PHE-ni kamrangna bang·bata changon, gipin biaprangoni re·bagiparangnasa kam ka·na cholrangko on·rongbatenga. Gipin biaprangoni re·bae kam ka·enggipa manderangko iandake mongsonggipa Project-rango kam ka·atengani a·sel rama jal·langrang aro nokrang ta·raken nosto ong·enga ine Marak parakataha.

“Gipin biaprangoni re·bae kam ka·enggipa manderangna kamrangko on·chengani a·selan joltangni chadamberang kamrangko ka·e cha·na cholko man·pajaenga,” ineba Tura-ni MDC parakataha.

Uandake kamgri dongenggipa chadamberang ding·chaoaona sokenga. Indake poraianiko dontongna nanggipa chadamberangna hajira ka·na cholrangko on·na gita, ua (MDC) dingtangmancha dakchakanirangko on·na miksongenga. Kam ka·e cha·enggipa chadamberangna walni (night) skul aro online education-ko on·skana gita ua education official-rang baksa chanchirimna a·bachengaha ine ua parakataha.

Gipin biaprangoni re·baenggipa manderangko nirokna nangengani gimin, niamgri bading chiwalgiparang aro licence gri hajira ka·enggipa manderangko Garo Hills-ona re·bana on·jawa ine Tura-ni MDC parakataha.

Uandakgipa manderangko nirokna gita GHADC-ni on·gipa ge·etanio, je manderangan gipin biaprangoniko kam ka·giparangko rimbaengachim, uamang skanggipa Nokmarangni No Objection Certificate (NOC)-rangko ra·chengna nanggen ineba Marak parakataha.

Dingtang dingtang constituency-ni local MDC-rangoniko NOC aro Recommendation-rangko ra·enba, GHADC-ni licence-na dorgastoko galna nanggen. Uni gimin contractor-rang ba nok nokgiparang maming lekka gri, gipin biaprangoni re·bae kam ka·giparangko nokchakengachim, uandakgipa manderangde, Sixth Schedule-ni dongimin niamo pangchake sastiko man·gen, ine Tura-ni MDC mikrakataniko on·ataha.

Garo Hills-o Skilled aro Unskilled labour-rang chu·onga gitan dongani gimin, pilak kamrangon joltangni chadamberangna skanggipa cholko on·chengna nanga ine Marak parakataha.