Chokpot, Sep 11, 2026:: Garo Students’ Union (GSU) Chokpot Regional Unit, Silkigre Unit aro Niksamso Garo Community Organization (NGCO) Chokpot Regional Unit, Bristibar salo adita jarangna skang viral ong·gipa, Bagangre Govt. LP Skulko nina re·angaha.

MGO-rangni parakatani gitade, South Garo Hills a·jani Chokpot C&RD Block-ni ning·o donggipa, Bagangre Govt. LP Skul nokko, songni manderangsa rike on·aha aro nokkingni tinrangko Skulni tangkachi bree pinaha, unbaksana noksamni berarangko Mondolini galgipa tinrangko chimonge ping·aha.

Ian Bagangre Govt.LP Skul ong·oba, da·odipet sorkarini maming dakchakataniko man·sokuja, ‘chinga an·tangtangsa bol wa·arangko chimonge, nokkap den·e ia Skul nokko rikaha’ ine songni manderang parakataha.

Ia Skulo poraienggipa bi·sarang sak 28 gnang aro class I-oni class IV-ona class ge·briko skigipa saksan skie on·enga. Ia sak 28 bi·sarangko chonbegipa Skul noko apsan chipdime, skie on·na gita nangenga ine parakatenba, mande ra·ako man·na kragipa, a·dokni Skotong Minister Conrad K.Sangma, bi·sarangni aro skigipani neng·nikaniko nirokate, Bagangre Govt. LP Skul nokko gital rike on·pachina NGO-rang mol·molataha.