Rongara, Sep 11, 2026: Meghalaya a·dokni Skotong Minister Conrad K Sangma, Bristibar salo Rongara-Siju-ni MLA Rakkam A Sangma, Chokpot MLA Sengchim N.Sangma-ni dongpaanio, South Garo Hills a·jani Rongara C&RD Block-o gital rikgipa Block Integrated Development Complex-ko nokdonggae on·angaha.

South Garo Hills a·jani Rongara C&RD Block-o gital rikgipa Block Integrated Development Complex-ko nokdonggae on·anio a·dokni Skotong Minister, jinmana aganprakangengon, Rongara-Siju-ni MLA Rakkam A Sangma-ko, an·tangni constituency-o donggipa manderangni namgnina rakbee kamrangko ka·engani gimin mittele aganangaha.

Rongara-Siju-ni MLA, namroro silroroaniko ra·bana niksamsoani gnang rakbee kamrangko ka·engani a·selsa da·alo ia gital Block Building-ko man·aha, ine Skotong Minister aganaha. Manderangna kakket ong·e aro an·tangtangko on·kangkuchina Sangma C&RD Block Official-rangko didiangaha.

Songadamrango donggipa manderang, an·tangtangni neng·nikanirangko namatna man·na ka·dongani gnangsa, Block Office-ona re·angenga, block office-o kam ka·enggipa manderang, uamangni nanganirang aro neng·nikanirangko knachakenba, uamangni nanganirangko chu·sokate on·na nanga ine Skotong Minister aganaha.

Batanggimin bilsi gittamni gisepo a·dok sorkari, manderangna nambate dangdike on·na aro office-o kam ka·enggiparang kamrangko ka·tona man·na gita a·dokni pilak biaprangon, mongsonggipa sorkari office-rangko taridapaha. Da·o Meghalaya a·dokni dam 56 C&RD Block-rangon, gital office nokrangko rike on·aha aro mitamrangko taridape on·aha ineba Skotong Minister aganangaha.

Meghalaya a·doko namroro silroroaniko ta·rakbatatna, mongsongbate songadamrango aro sima arirango sorkarini kamrangko manderangona sepangbatatna gita sorkari raken kamrangko ka·enga ine Sangma agandapangaha.