Tura, June 19, 2026: Association for Democracy and Empowerment (ADE) H.Q Tura, re·baenggipa June 21 tarik Robibar salo ong·atenggipa, NEET porikkako name aro somoi gita ong·atchina mol·mole, National Test Agency (NTA)-ni Director-na, West Garo Hills, DC-ni jak gita chitti sedoataha.

ADE-ni seatgipa chittio janapatani gitade, skang ong·atanggipa, NEET porikkao, mitam Invigilator-rang ba porikkako nirokgiparang, porikka sechakram biapona ba Centre-ona ja·manchake, sokbaani a·sel, chatro chatrirang neng·nikaniko man·ani ja·man, bang·a complaint-rangko man·soaha.

Invigilator-rang Attendance Sheet-o dongimin somoi gita, soi ka·jaengani a·sel, chatro chatrirang somoi gita porikka sena man·jaenga aro somoirang chu·ongjae, namen neng·nikaniko man·tokenga. Uni a·sel, NEET porikkako seenggipa chatro chatrirang an·tangtangni gamchatgipa somoirangko gimaatna nangenga aro namen duk jajrengani ong·enga, ine parakataha.

Bang·a chatro chatrirangan porikka segipa hall-o administrative-ni kamrang ja·manchakani a·sel, ding·chaonirang ong·katenga. Chatro chatrirang porikkana on·gimin somoirangko name jakkalna man·jaenga ine suk ong·gijaniko parakataha.

Ia June jani 21 tariko NEET porikkako sena gita tik ka·manahani gimin, iani bidingo ta·raken nirokatchina, “Chinga National Testing Agency-ko mol·molenga” ine ADE Tura, NTA-na seachi u·iataha.

Pilak Invigilator-rang aro kam ka·giparang porikkana dongimin somoina skangan, Centre-ona ba porikka sechakram biapona sokbana nanga.
Attendance-ko niroke, somoi gita soi ka·ani aro lekka-rangko niroke chek ka·aniko porikka sena a·bachengon, chu·gimikko matchotatna nanga.

Porikka a·bachengani ja·man, chatro chatrirangni ding·chaoaniara, NTA-ni dongimin somoiko name jakkalna man·jani a·sel ong·enga. Uni gimin, chatro chatrirangni namgnina maming neng·nikaniko on·gija, Invigilator-rang an·tangtangna tikatgimin kamrangko kakketo ka·na nanga. Administrative maming saloba, porikka seenggipa chatro chatrirangni somoiko gimaatna nangja aro chatro chatrirangna on·gipa somoiko name jakkalna nanga.

West Garo Hills a·jani pilak Centre-rangon, porikkako name ong·atna man·na gita, name nirok simsakanirangko dakna nanga. Pilak Invigilator-rang aro kam ka·giparang, porikka a·bachengna minit 30 skangan porikka segipa Center-ona sokbana nanga, ine ADE dabiangaha.

​Hajalni hajal, NEET porikkako sena poraisoenggipa chatro chatrirang name porikka sena man·jaode, sako dos galgen, porikka seaniko nirokgipa Invigilator-rangni daito ong·gen. Uni gimin Invigilator-rang namedake, NEET porikka segiparangna simsake somoi gita, cholko on·na nanga, porikka a·bachengani ja·man, attendence sheet-o soi ka·na nangja. Jedakode, chatro chatrirang mikkangchi maming neng·nikani gri porikkako sena man·na nanga aro mikkangchi maming complaint dongna nangja, ine ADE dabiangaha.