Tura, June 20, 2026: West Garo Hills a·jani Barengapara Civil Sub-Division-ni ning·o donggipa Rimrangpara-oni Josipara-ona PMGSY ramako tarigipa gipin jatrangko maming lekkarang gri kam ka·na rimbahani gimin, June 18 tariko West Garo Hills a·jani Labour Inspector-na aro Tura-ni SP-na, Sairill D Marak badi ka·doangaha.

Koborna u·iatani gitade, MP Agarwal-ni Manager Nobin Chetry, kam ka·giparangko ua an·tangan nanggipa lekkarangko tarie ong·gen ine kam ka·giparangko okamataha. Ua lekkarangko chu·onga gita tarimanaha ine tol·enba, kam ka·giparangko rimbaaha. Nobin Chetry kam ka·giparangko rimbana, labour licence-rangko tarian baksa songni Nokmana koborko on·na nanga, ine ma·sioba tol·e, rimbaaha aro rimbaani ja·manba, songni Nokmana koborko on·jaha.Indake dongimin niamko pe·aha ine Marak parakataha.

Niam pe·gipa Nobin Chetry-ni kosako niam gita sastiko on·na nanga ine Marak dabiangaha.

Sixth Schedule-ni a·jarango labour licence aro Nokmani NOC gri gipin jatrang skatang Garo Hills-o nape kam ka·e cha·na aro bading chiwalna man·ja. Gipin jatrang Garo Hills-o kam ka·e cha·na aro bading chiwalna sikode, nanggipa lekkarangko tariesa, niam gita napna man·a ine Marak parakataha.

Indake ong·genchimoba, gipin jatrang Garo Hills-o napna gita, Department-ni Officer-rang, Nokmarang, Civil Society aro NGO-rangni koborko ra·chengesa re·bana nanga ineba ua parakataha.

MP Agarwal-osan gipin jatrang kam ka·enga ong·ja, Garo Hills-ni gipin biaprang jekai Dalu jolrango gipin jatrang bang·en kam ka·enga, indiba Labour Official-na ta·raken u·iataha. Uni gimin MP Agarwal-ni kosako ta·raken am·sandianiko dakchina Marak department-ko didiaha.