Ampati, Apr 27:South West Garo Hills a·jani adita bakrango Robibar walo mikka balwa ta·rakanichi dingtang dingtang songrango nok-jamrang nosto ka·ako man·aha aro sak 76 nokdangrang nangchakeako man·aha.

DC office-oni u·iatani gitade, South West Garo Hills a·jani dingtang dingtang biaprango mikka balwa ta·rakanichi, bang·en nok-jamrang nosto ka·ako man·genchimoba, darangba janggi gimaa aro mata buanirangko man·jaha.

South West Garo Hills a·jao mikka balwa ta·rakanichi, Rerapara, Zikzak aro Purakhasia C&RD Block-rangni ning·o ga·akgipa biaprango nangchakeaniko man·tokaha ine official-rang parakataha.

Official-rangni u·iatani gitade, mikka balwa ta·rakanichi, Rerapara Block-ni ning·o donggipa songrang nangchakeaniko man·bataha aro komibeoba dam 5 songrangoni sak 36 manderang, neng·nikanirangko chagrongna nangaha. Ua jolrango, nok te·sakode chu·gimik nosto ong·aha aro gipin nok te·bri, adita nosto ka·ako man·aha ine official-rang u·iataha.

Zikzak C&RD Block-ni ning·oba, dam 3 songrango, nok te 5 adita nosto ka·ako man·aha aro sak 28 manderang neng·nikanirangko chagrongna nangaha ine official-rang parakataha.

Purakhasia Block-ni dam 2 songrango nangchakeaniko man·aha aro ua songni te 2 nokrang nosto ka·ako man·e sak 12 manderang, neng·nikanirangko chagrongna nangaha.

South West Garo Hills a·ja gimiko dam 10 songrang nangchakeaniko man·e, nok te 1-de chu·gimik nosto ka·ako man·aha aro te 11 nokrang adita nosto ka·ako man·aha ine official-rang parakataha.

South West Garo Hills a·jao mikka balwa ta·rakanichi, Mellim Primary Health Centre (PHC)-ni solar panel-ko pe·aha aro bijoli line-rang nosto ka·ako man·aha aro DC office-ona dakanggipa ramaba champengatako man·aha ine official-rang parakataha.

Indake ong·genchimoba, mikka balwa ta·rakangani ja·man, official-rang ta·raken kamrangko ka·e bijoliko on·pilna man·aha ine u·iataha.

Mikka balwa ta·rakanichi baditana kingking nok-jamrang nosto ka·ako man·aha, official-rang hisap ka·na gita a·bachengaha ine u·iatenba neng·nikanirangko man·enggipa nokdangrangna dakchakanirangko on·na gita official-rang kamrangko ka·engaha ine parakataha.