Tura, April 16, 2026: Babelapara-ni MDC Rakesh Sangma-ko Garo Hills Autonomous District Council (GHADC)-o High Power Committee-ni Chairman-na songaniko A·chik State Peoples’ Front (ASPF), raken jegalataha.

Re·anggipa March 23 tariko
Sixth Schedule-ni ning·o tribal-rangni daka rikani bewalrang aro niam-retirangko ripingna Garo Hills Autonomous District Council-o gital niamko ra·gatanio Rakesh A Sangma, jean Rakesh Newar A·chik ma·chongona an·tangko dejitanina bang·a manderangan jajaani ong·enga ine ASPF-ni General Secretary Bernita R.Marak parakataha.

Sixth Schedule-ni ning·o gipin jatrangko sason ka·na on·aniara niamko pe·ani ong·a. Garo Hills Autonomous District Council (GHADC)-o Executive Committee-ni bilara indin ong·ja, indiba Sixth Schedule-ni ning·o niamko ja·rikna district Council-ni dongimin niam ong·a. GHADC-o High Power Committee-ni bilara Chief Executive Member (CEM)-ni bil baksa apsan ong·a ine Marak aganaha.

Sixth Schedule-ni ning·o gipin jat Rakesh Newar (Rakesh A Sangma)-ko High Power Committee-ni Chairman-na songaniara ra·chakna man·gijani ong·a. Scheduled Tribe-ni niamko name ja·rikchina aro High Power Committee-ni Chairman-oniko ra·galchina, ASPF dabiangaha.

Jedakode mikkangchi GHADC-o maming neng·nikanirangko man·jana gita Garo Hills Autonomous District Council-o rakgipa niamrangko donchina, ASPF, GHADC-ni Executive Committee-ko mol·molataha.