Dadenggre, April 15, 2026: Re·anggipa March jao Garo Hills-o so·sojengjeng ong·ani ja·man, badi (FIR) ka·anio pangchake, dingtang dingtang Civil Society Organization (CSO)-ni dilgiparangko pulisrangni rim·anina aro mittamrangko rim·dapna am·kuengani gimin, Dadenggre-ni dingtang dingtang NGO-rang, Nokma Sanirang aro songni manderang, Dadenggre-ni Civil Sub-Divisional Officer (SDO)-na badi ka·doangaha.

Garo Hills-o so·sojengjeng ong·mitting somoio NGO-ni dilgiparang, tom·tomaniko ra·bana gitasa songni nokni manderang baksa chanchirime kamrangko ka·ahachim, indiba pulisrang, da·o dingtang dingtang NGO-rangni dilgiparangko rim·skaenga, ine Dadenggre-ni CSO-rang parakataha.

Dadenggre CSO-rangni SDO-na badi ka·doangani gitade, CSO-ni dilgipa saksako Dadenggre-ni pulisrang, manderangni gam-jinrangko nosto ka·e galanina aro so·sojengjeng ong·atanina, Bharatiya Nyaya Sanhita (BNS) aro Meghalaya Maintenance of Public Order Act (MMPO)-ni dingtang dingtang Section-ni ning·o badi ka·anio pangchake, April 11 tariko, Dadenggre Pulis Station-o mikkangpaechina okamataha.

Indake, dilgiparangni kosako matnanganiara, sakkirangko mikrontangchi nikgipa manderangni agananio pangchakani ong·ja, indiba manderangni jangbingbanganio pangchakesa matnangani ong·aia, ine tom·tomaniko ra·bapilna kam ka·gipa dilgiparangko rim·aniara, ding·chaoataniko ra·baanisa ong·aia, ine Dadenggre-ni CSO-rang parakataha.

CSO-ni dilgipako rim·na skang, medical check-up ka·aniko Dadenggre-ni dingtang dingtang NGO-rang raken jegalataha. Maina, “Medical check-up-rangko pulisrang rim·ani ja·man ka·ronga, indiba ia dilgipako rim·na skangan medical check-up-na rimangaha aro ian CSO-ni dilgipako jinmani mikkango kratcha·atna dakani gita ong·a,” ine Dadenggre-ni CSO-rang parakataha.

Dilgiparangko basee, badi ka·ani aro Pulis Station-rangona okamaniara, manderangni gisepo kenaniko aro sorkario ka·dongna man·gijaniko parakani ong·a ineba Dadenggre-ni CSO-rang parakataha.
Indake ong·engon, dilgiparangni kosako badi ka·aniko jakgitele sandirokchina aro sandirokengmiting somoio dilgiparangni kosako pulisrangni dokkol ka·aniko dontongchina, Dadenggre-ni CSO-rang didiataha.

Dadenggre jolrango tom·tomaniko rakkiangna gita Sub-Divisional Administration aro CSO-rangni gisepo tom·aniko ong·atchina gitaba CSO-rang didiangaha.