Tura, Oct 7, 2025: Garo Hills Autonomous District Council (GHADC)-o kam ka·enggiparangna ja 12-ni dormaharangko re·baenggipa October 15 tarikni gisepon matchote on·na gita Sombar salo, sorkarini songe on·gipa District Level Sub Committee,GHADC-ni EC aro Non Gazetted Employees Association (NGEA)-ni dilgiparang baksa GHADC office-o tom·aniko ong·atangaha.

NGEA baksa tom·a matchotani ja·man, West Garo Hills a·jani Deputy Commissioner aro District Level Sub Committee-ni Chairman Vibhor Aggarwal, kobor ra·timgiparangna aganengon, GHADC-o kam ka·enggiparangna ja 12-ni dormaharangko October 15 tarikni gisepon matchote on·na miksongengani bidingo NGEA-ni dilgiparangna talate on·angaha.

GHADC-o kam ka·giparang, October 6 tarikoni kamtangtangko ka·na a·bachengpiltaiahani gimin, ja 12-ni dormaharangko ta·raken on·na gita GHADC-ni Official-rang aro Sub Committee, baksa NGEA-ni dilgiparangna talate on·angaha ineba Aggarwal aganaha.

Deputy Commissioner-ni parakatani gitade, GHADC-ni official-rang da·o dormaharangko on·na nanggipa lekkarangko tariengaha aro kamrang matchotahaon GHADC-o kam ka·giparangna ja 12-ni dormaharangko on·gnok.

Sombar salo Sub Committee baksa tom·e chanchirimani ja·man NGEA-ni President Brithen M Sangma-ba kobor ra·timgiparangna aganengon, “Chinga ia ja 12-ni dormahako ra·na kusi ong·jagenchimoba, kam ka·giparangni namgnina ia dormaharangko ra·chakna ga·akaha” ine aganaha.

Indioba, District Council-rango kam ka·giparangna November 1 tarik dipet a·dok sorkarini dormaha on·na tik ka·ani giminde, da·o dipet sorkari maming see jote on·a dongkuja, ku·sik mangmangchisan ku·rachakani gimin ka·dongna man·jae jajaani ong·enga aro maming condition gri ra·chaknade kenani ong·enga ine NGEA-ni President aganaha.

District council-rango kam ka·giparangna a·dok sorkarini dormaha on·na tik ka·aniko a·dok gimikni manderangan jegaltokengani gimin, Garo Hills-o songdongenggipa manderangni nangnikani gitasa ong·gen, iade GHADC-o kam ka·giparangni issue-san ong·ja, indiba jat gimikni issue-sa ong·a, ine Brithen Sangma aganaha.

Indake ong·engon, GHADC-o kam ka·giparangna ja 12-ni dormahako changsano on·gija, changni chang dake on·kirotgenchimode, jingjengatpiltaina draatako man·gen ineba NGEA-ni President mikrakataha.