Guwahati, Aug 23, 2026: Re·anggipa August 19 tarikoni Assam aro Meghalaya a·dok ge·gnini gisepo nanggrikanirang dongengkuani gimin a·dok damgni nangrime adita niamrangko ra·gatna ga·akaha.

Nangan somoio dakchakaniko on·grikna pangkamgipa District Level Coordination Committee (DLCC) aro gipin a·songoni re·bagipa Tourist-rangko aro garirangko champenga gri naljoke rakkina aro re·rurana man·na gita niamrangko tariaha. A·dok ge·gnini adita sak Minister-rang aro MLA-rang baksa agangrikani ja·man, tarigimin niamrangko Meghalaya Deputy Chief Minister Sniawbhalang Dhar aro Assam-ni Minister Atul Bora Guwahati State Guest House-o Sonibar salo parakataha.

Ua Coordination Committee-o Assamn-ni IG, Special Branch aro Meghalaya-ni IG, Law & Order-ni gita, uamang nangrime kamrangko niroke ka·anggen. Da·o ong·enggipa obostarang ka·sinkujana kingking songregiparangni neng·nikaniko man·e dongenggiparangko dakchakna helpline-koba dingtangmancha kuliaha.

Una agreba a·dok ge·gni nangrime pangkamgipa District Level Joint Committee-rangko, Deputy Commissioner-rang aro pulis officer-rang nirokanggen, ine tik ka·angaha. Uamangan salantio Assam aro Meghalaya-ni sima-ario kajia golmalrangko sandie uarangko namatna kam ka·anggen ine parakataha.

Dingtang Joint Committee ge·gni jeon a·dokni transport officer-rang gipin a·songoni re·bagiparangni naljokanina kam ka·angskagen. Assam aro Meghalaya a·dokrangko nappake songreanio pilakan naljokaniko man·na nanggen, jekai Barak A·kaweoni gipin biaprangona Meghalaya-ko nappake songreani aro Meghalaya-ni manderangba apsan daken Assam-ko nappake songre songgabatanio maming neng·nikanirangko chagrongjawa ineba parakaha.

Meghalaya Sorkari a·dokona Assam-ni ba je biaponiba songrebagiparangna naljokaniko on·gen ine parakatenba, je KSU-ni dilgiparangan dos dakahachim, President, Vice President aro General Secretary-ko Meghalaya Maintenance of Public Order (MMPO) Act-o pangchake rim·aha .Ua obostao pangchake sorkari 15 FIR-rangko man·soaha aro jemangan Assam registration number garirangko nosto ka·ahachim uamangoni sakbongako rim·aha ine Dhar parakangaha.

Jemangkon rim·na man·kujachim, uamangko rim·na gita Special Investigation Team (SIT) kamrangko ka·enga. A·dok damgnio jemangan songrena brange dongengachim, uamangko sandie kamrangko ka·engaha. Meghalaya-o donggipa Assam-ni garirangko bol 3770-na baten escort ka·e Assam-ona watatpilaha.

Unbaksana brange donggipa sak 400 ba 500 mang songregiparangko Umiam jolrangoniko naljoke watatpilaha aro da·o mitam dongkuenggiparangko sandie konta 24 ni gisepon watatgen ineba Dhar parakangaha.

Indake Minister-rangni tom·e chanchirimanio, August 19 tariko nosto ka·ako man·gipa garirangna compensation-ko gamgen, ine Sniawbhalang Dhar ku·rachakangaha. Uni gisepon, Meghalaya sorkarini ku·rachakgiminko chu·sokatja ong·ode, gari re·na on·gija rama champengataniko a·bachengatpiltaigen, ine Assam State Taxi Drivers Union-ni dilgiparang parakatskaha.