Tura, August 23, 2026: Tura Beldalpara-ni contractor Sitaram Bagree minggipa mandena Shillong-o GHADC Guest House building gadangniko rikna, GHADC-ni Civil Works Department, NEC Scheme-oniko gong kror 8 lak 95 tangkarangko on·aha. Uaoniko gong kror 1,38,45 tangkarangko Sitaram Bagree, contractor-ni account-o chipataha aro ua tangkako mai kamna jakkalaha aro kam ka·gija, ua tangkako bachi gimaataha, ine sing·anina, Kharkutta-ni MDC Cherak W.Momin an·tangan mediao manderangna talataniko on·ataha.

Ua tangkarangko kam gri maina jaklalaha, uarangko sandichina, “Chinga dolgni NGCO aro ANYO uamangni kam gri maini gimin, tangkako contractor-na on·aha aro ua gong kror 1.38,45 tangkarangara maming bimang gri bachi gimaaha, ine chinga, August 8 tariko Tura Pulis Station-o badi ba FIR ka·ahachim. Indiba pulisrangni FIR Report-na aganchakanirangko chinga chu·onge nikjaha aro uani bidingo sandianiko dakna jechakaha”, ine NGCO-ni President Tengrak Marak parakataha.

FIR ka·ani salon Work Order baksa chinga Tura Pulis Station-o on·baaha, indiba da·alo jechakani gitade, reply-ko on·ani bidingo chinga kusi ong·ja. Rulling party-o dongenggipa Executivs Member-rangni parak ong·e, manderangna u·iatanio kakket aro bebeko am·sandigenchim ong·ode, uan baditana kakket aro bebeko pilakan parak ong·e, chong·motko ma·sigenchim.

Indiba pulis officer incharge-ni sakkirang chu·ongja ine aganchakaniara bebe ra·na amgijani ong·a. Iani bidingo, “Chinga raken ja·ku de·angkugen aro jrip dongjawa. Chingna kakket bichalko nanga, manderangni tangkarangko kam ka·gija tol·e cha·bokako chinga nie dongjawa aro uni kosako raka ja·kurangko de·angkugen. Iako chinga parak ong·e, jinmana u·iatgen” ine Marak parakataha.

Sitaram Bagree, genuine contractor ong·ama ong·ja, gimikkon chinga am·sandie manderangna u·atgen, ineba NGCO dilgipa parakataha. .