Tura, August 23, 2026::West Garo Hills, a·jani Amongpara jolo mobile network aro internet namsrangjae neng·nikaniko man·engani gimin, Amongpara GHADC Constituency-o Garo National Council (GNC)-ni candidate ong·e susana sienggipa Jakrak A Sangma West Garo Hills a·jani, Deputy Commissioner-na sedoaha.

Uni seatgipa chittio janapani gitade, Amongpara jolo donggipa bang·a songrang jedake Agindangre, Rongkugri, Sasatgre, Dura A’simgre, Rongsigre, Rongpinggre, Karijoragre, Nokwatgre, Dobagre, Durabanda, Kalupara aro uni sepangjolo donggipa gipin songrango mobile network aro internet namsrangjani a·sel bang·a neng·nikanirangko chagrongtokenga.

Neng·nikanirangko man·enggipa songrango aro uni sepang jolo donggiparang 2G-na agre 4G/5G dongja, online class ra·giparang net-banking aro Aadhaar-rangko somoi gita ka·na man·ja, nangchongmotani somoirango Ambulance-na call ka·na man·ja, internet namjani a·sel digital payment aro sorkarini u·iatanirangko ma·sina man·ja. Iasan ong·aigija bang·a chatro chatrirang aro chadamberang uamangni poraianirangko mobile network aro internet service namjani a·sel neng·nikaniko chagrongenga. Ia neng·nikanirang ru·uta somoirangonin man·baenga, iani bidingo badi ka·genchimoba, telecom company maming namdapatniko dakja ine Sangma u·iataha.

Uni gimin ia neng·nikanirangko namatna BSNL, Jio aro Airtel tower gital-ko songe on·china, authority-rang aro telecom company-rang nambata mobile network aro internet service-ko on·a gita ia neng·nikaniko mongsonggipa ong·e ra·china aro obostarangko u·ina gita a·damona re·e nichina, Amongpara GHADC-ni official GNC candidate Jakrak A Sangma Deputy Commissioner-ko didiataha.