Shillong, April 28, 2026: Ru·uta bilsirangoni Garo Ku·sikko official language dakchina dabienganiko, Meghalaya Official Languages Ordinance, 2026-ko chong·motan Garo aro Khasi ku·sikko English baksa official language dake jakkalna gita a·dokni Governor Chandrashekhar H. Vijayashankar, mijal April 27 tariko ra·chakaha ine Skotong Minister Conrad K. Sangma parakataha.

Skotong Minister, a·dokni Governor-ko dingtangmancha mittelatenba, uni ra·chakanichi Khasi aro Garo ku·sikko Eighth Schedule-o napatna miksonganiko parakataha.

Meghalaya Official Languages Ordinance, 2026-ni, 2026 bilsio Governor-ni skanggipa ge·etataniko Meghalaya-ni Extraordinary Gazette-o segataniko manderang ma·sie ra·na man·na gita chapa ka·ataha. Iako State Legislative Assembly-ni Session ong·kujani gimin, India-ni constitution-ni Article 213 (1)-ni ning·o Governor ra·chakaha.

Ia ge·etaniko on·ani gitade, sorkarini tarikrangko parakatani ja·mano English, Khasi aro Garo ku·sikko a·dokni sorkari office-rango dingtang dingtang nanga kamrangna jakkalna man·gnok ine u·iataha.