GHDNEWS#

ghdnews.in

Tura, Oct 29, 2025: Garo Hills-ni sima jolrango, A·chik me·chikrangko gipin jat me·asarang mikchaa ka·saa dakmike bia ka·mika dake, cha·bokanirang batroroenga ine A·chik State Peoples’ Front (ASPF) parakatenba, indake A·chik me·chikrangni kosako ong·gija dakanirangko champengatna ja·kurangko de·china a·dokni Skotong Minister-ko didiataha.

ASPF-ni Skotong Minister-na sedoatgipa chittio parakatani gitade, Garo Hills-ni sima jolrango, A·chik me·chikrangko mikchaa dake, mitamrangko bia ka·na ku·rachakmika dake, gipin jat me·asarang cha·bokanirang batroroenga aro uandaken bang·a A·chik me·chikrang janggi tanganio nosto ka·ako man·tokenga.

Badiaba obostarangkode report ka·enga, indiba badiaba obostarangkode report ka·chipgija donenga. A·chik me·chikrangoni bang·batan tol·e ku·rachakanirangko man·enga aro mitamrangde draaniko man·e gipin jat me·asarangni cha·bokako man·engani a·sel A·chik me·chikrang nosto ka·ako man·enga ine ASPF parakataha.

Cha·bokako man·gipa bang·bata A·chik me·chikrangan, songsalni chonnikako man·na kene, mitamrangde maming dakchakani gri, iandakgipa a·selrangko jrip dontokenga ineba ASPF parakataha.

“Adita salrangna skang Rajabala-o A·chik me·chik saksako rim·srukangani bidingo knasona man·aha. Ua a·selni gimin, jatgni dinggrikaniona sokangpilaha, indiba ua me·chikna naljokaniko on·na aro uani bidingo sandirokna gita maming ja·kurangko de·chipjaha”, ine ASPF-ni General Secretary Bernita R Marak parakataha.

ASPF-ni parakatani gitade, iandakgipa a·selara iasan ong·ja, indiba Krishnai, Paikan, Balbola, Goalpara, Phulbari, Tikrikilla, Rajabala, Bhaitbari, Singimari, aro Mahendraganj songrango ong·a obostarangko knasona man·enga.
Indake me·chikrangni kosako ong·gija dakanirangko sandirokna gita District Administration aro Womens’ Pulis Cell-rang baksa bakrime jakgitelgipa, Inquiry Committee-ko songchina gitaba ASPF dabiangaha.