Tura, April 29, 2026: Ampati jolni Kissan B Marak an·tangko Meghalaya Power Distribution Corporation Limited (MePDCL)-o kam ka·gipa ine tol·enba manderangoniko cha·boke cha·anina, West Garo Hills a·jani Jengjal pulis rim·aha.

Pulisrangni parakatani gitade, Jengjal Nengkalgre songni mande saksaoniko ua tangka gong 6,750-ko tol·e ra·an baksana bang·a manderangoniko bijolina kajina giltimgipa dake tol·enba tangkarangko ra·aha. Ua adita somoirangna kate chakani ja·man, April jani 27 tariko Jengjal Pulisrang uko rim·na man·aha.

Uni kosako manderang Jengjal Pulis Station-o badi ka·anio pangchake, am·sandianiko dakanio, Kissan Marak apsan daken bang·a manderangko cha·boke cha·aha ine pulisrang ma·sina man·aha. Uni kosako komibeoba ming 6 case-rangko segataha, una agreba badi ka·kugijagipa manderang dongkuengnaba donga ine pulisrang chanchichipenga.

Iandake cha·bokgipa manderangna simsakchina authority-rang manderangko didiatan baksana iandakgipa apsan obostarangko chagrongtaia ong·ode, ba iandakgipa kamrangko ka·enggipa manderangko nikgenchim ong·ode, uamangna ta·rake koborko on·china didiataha.