Chokpot, May 17, 2026: Chokpot jolni nangrimgimin dingtang dingtang NGO-rang baksa songni nokni manderang, Sonibar salo sorkarinii da·o songo noko rama jal·lang, tarigipa, nok building rikgipa Muslimrangko napna on·aniko knachake Chokpot jolni dal·dalgipa sorkari project-rangko kam ka·na Muslimrang sakbri baksana Hindu-rangko je gita sakba rimnapna man·gen aro A·chikrangkoba hajira ka·chapatna nanggen ine tik ka·aha.

NGO-rangni parakatani gitade, songni nokni manderangko hajira rimchape ka·atchina aro uamang Chokpot jolona kam ka·na re·baengon, Labour Department-o Register ka·na nanggen aro a·doko kam ka·na re·baon, kam ka·chakenggipa biap ba songni A·king Nokmani NOC-ko ra·an baksana Chokpot-ni nangrimgimin NGO-rangoba bimingrangko segatchengna nanggen, ine tik ka·aha.

Iindake songni nokni manderang saobarang noktangko nokrik nokdakna rimbagenchimode, sakgni Muslim-rangkosan rimbae kam ka·atna man·aigen, unbaksa A·chikrangko rime hajira ka·atna nanggen ine jinma tik ka·angaha.

Uni gisepon, NGO-rangni dongimin niamko manija ong·ode, Chokpot-ni nangrimgimin NGO-rang uamangni kosako raka ja·kuko de·gen. Uamang re·bae kamrangko ka·engon, darangba kam ka·enggipa biaponi ong·kate roramjachina aro bajarchi korosrangna re·angode, nok nokgipa ba A·chik labour-rang uamangna nanga bosturangko bree on·na nanggen.

Bading chiwalgiparangni gimin chanchion, da·o dipetde, darang Muslimrangba Chokpot jolo bading chiwalgiparang napbana man·kujawa aro songdongkamgipa gipin jatrangba jemangan bading chiwalengachim aro jemangan A·chik me·chikrangko jik ra·e, bading chiwalengachim, uamangba TNT licence-ko tariesa bading chiwalna man·gen ine tik ka·angaha.