Ampati, Oct 21, 2026:: South West Garo Hills a·jani Rerapara Community & Rural Development (C&RD) Block-o gital rikgipa office nokko Monggolbar salo, a·dokni Skotong Minister Conrad K Sangma, Gambegre-ni MLA Mehtab Chandee A Sangma, Mahendraganj-ni MLA Sanjay A Sangma aro Rangsakona-ni MLA Subir M Marak-ni dongpaanio, oprake on·angaha.

Ia tom·anio a·dokni Skotong Minister, Rerapara A·king Nokma aro uni ma·drangrangko, gital block office-ko rikna a·arangko on·ahani gimin mittele aganangaha. Indake tom·anio a·dokni Skotong Minister, Garobadha-oni Tura-ona re·gipa, Agia-Medhipara-Phulbari-Tura (AMPT) ramako tarina pangchakani ro·ongko songe on·angaha. Rerapara-ni Samandalgre-o gital rikgipa dolongkoba oprake on·angjolaha.

Ia tom·aniko ong·atanio a·dokni Skotong Minister, jinmana aganprakengon, a·doko Secretariat-an chubatgipa gadangni office ong·naba gnang, indiba manderangna dangdike on·anio, Block Development office-rangan mongsongbatgipa office ong·a ine aganaha.Sorkarini bang·bata scheme aro program-rangkon block office-rang gitasa chu·sokate on·a. Block office-rango BDO aro gipinrang kamtangtangko name ka·a ong·ode, manderangni nanganirangko 75% percent-de chu·sokatna man·gen ine ua aganaha.

Batanggipa bilsirango a·dokni block office-rangko chalaianio neng·nikanirangko chagrongani gimin, a·doko 70% percent block office-rangko para ra·esa chalaiachim indiba sorkari, kam ka·giparangni neng·nikanirangko ma·sichake, a·dok gimikon block office-rangko gital rikna aro taridapna gong kror 200-mang tangkarangko chamataha ine Skotong Minister aganaha.

Uandake dingtang dingtang department-rangoba, dingtanganiko ra·bana sorkari kam ka·enga . A·dok gimiko dam 2000-na baten sorkari skulrangko rikaha aro mitamrangko taridape on·aha ineba ua aganaha.

Sorkario kam ka·giparang pilakkon Skotong Minister, ka·sachakani, ka·dongani, kakket ong·ani aro manderangna ka·saani gnang dangdike on·china gitaba ua didiangaha.