GHD News

ghdnews.in

Tura, Oct 29, 2025: Bilsianti ong·atrongenga gitan ia bilsioba chang 49-gipa Hundred Drums Wangala Festival-ko, ong·attaina Wangala A·dam Chibragre-o biaprangko tarisoengaha.

Ia Wangala-ona manderangko sokachakna gita dingtang dingtang biaprangko tarisoengon, garirarangni re·ruraanio maming neng·nikanirang dongjana gita ramarangkoba ‘one-way’ dake tarisamsoenga ine Hundred Drums Wangala Festival Committee (HDWFC)-ni dilgiparang u·iataha.

Ia 100 Drums ba Dama Bol 100-ko doke Wangalanianiko ong·atna tarisamsoengon, batanggimin changrango dama bol 100-ko doke Wangalanianiko Chibragre-o ong·atanio neng·nikanirangko chagrongna nangengani gimin wangala biapona re·napani cholguga dilsako aro re·ongkatna rama dilsako dingtang dingtang dake tarisoenga ineba HDWFC-ni dilgiparang parakataha.

“Ia Wangala A·damona re·baenggipa pilak garirangan, NEHU-ni Rural Development Department-o donggipa Fishery Point-oni re·napbagen aro ia biaponi re·angpilengon, Chibragre Picnic Spot gita Goeragre-o donggipa National Highway ramaona najokegen,” ine Committee u·iataha.

Ia Dama bol 100-ko doke Wangalanianiko ong·atenggipa HDWFC-ni u·iatani gitade, ia chang 100 Drums Wangalanianiko re·baenggipa November 5 tarikoni a·bachengate, skanggipa salo, Wangalanianio bak ra·enggipa dingtang dingtang dolrang, Wangala a·damona sokbagen aro an·tangtangko tarisotokgen.

Ia 100 Drums Wangalanianiko November 6 tariko dingtangmancha Mondoliko dilenggipa manderangni bi·anichi a·bachengatgen aro uni ja·man, sokbagipa manderangna Memento-rangko on·e, Dimdim Dimchong Dadichong, Wangalani gitko jinma ring·gen. Uni ja·man, HDWFC-ni Chairman Ronald Rikman Ch. Sangma, rimchaksoani kattarangko agananggen aro tom·aniona mongsonggipa sokgipa jinmana aganprakanggen.

Gnigipa sal, chong·motan November-ni 7 tariko, pangna dakrongbewal gita Rugalaniko ong·atanggen aro uni ja·mano dama bol 100-ko doke skanggipa chrokaniko ong·atanggen.

Indake, dama bol 100-ko doke Wangalani bon·kamgipa salo, chong·motan November 8 tariko, Wangalanio bak ra·enggipa dol 10 Wangalgipa dolrang dama bol 100-ko doke Wangale chrokaniko dakangskagen.

Ia chang 49-gipa dama 100-ko Wangalanio, Meghalaya a·dokni Skotong Minister Conrad K Sangma, Meghalaya Governor CH Vijaya Shankar, Warachakenggipa dolni dilgipa Dr. Mukul M. Sangma aro Tura-ni MP Saleng A Sangma-ba bak ra·anggen ine u·iataha.