Tura, June 12, 2026::Garo Hills Autonomous District Council (GHADC)-ko 1952 bilsio man·chengaoni bilsi 74-ni ja·man, GHADC-o kam ka·enggiparangna Service Rule-ko ra·gatna gita, GHADC-ni gital Executive Committee (EC), Service Rule-ko ra·gatna tik ka·aha.

GHADC-ni Executive Committee, Mongolbar aro Budbar salgnina tom·aniko ong·ate, chanchirimaniko dakenba Service Rule Bill-ko pass ka·aha aro ia bill-ko re·baenggipa GHADC Session-o jinmani namnikanio table ka·e, Governor-na watdoatgen.

Iani bidingo Garo Hills United Alliance (GHUA)-ni Executive Committee-na ku·wattimgipa aro Kharkutta-ni MDC Cherak W Momin, kobor ra·timgiparangna talatangengon, 1952 bilsioni a·bachenge da·alona kingking, GHADC-o kam ka·giparangna Service Rule-ko tarina man·chipkujani gimin, Dhormonath Ch.Sangma-ni dilenggipa, Executive Committee, Mongolbar aro Budbar salo salgnina tom·e chanchirimenba, ia Bill-ko pass ka·na man·aha ine Momin parakataha.

Ia Service Rule Bill-ko Executive Committee pass ka·ahani gimin re·baenggipa jao GHADC-ni session-ko ong·ataniona ra·anggen aro uno jinma ra·chakahaode, a·dokni Governor-ona uni ra·chakaniko man·na gita watatgnok ineba Momin parakataha.

EC-ni salgnina tom·anio, GHADC-ni dingtang dingtang kajinarangko gamna gita Online Portal-ko kulina gitaba tik ka·aha ine Momin parakataha.

“A·a pattarangko tarianio, chel·a biaprango donggipa manderangba, GHADC, Tura-ona re·baesa pattarangko tarina aro kajinarangko gamna nangtokengani gimin, chel·a biaprango donggipa manderangna kamrangko altubatatna gita, a·a patta tariani aro kajinarangko Online gita gamaniko a·bachengatna manchie, ia Portal-ko a·bachengataha,” ine Momin parakataha.

GHADC-na dingtang Electoral Roll-ko tariani bidingo janapatengon, dingtang Electoral Roll-ko tarina gita je Committee-ko songe on·aha aro ia Committee-ni bon·kamgipa report-ko ia jani gisepon on·gnok aro ia Committee-ni Report-ko man·ahaon, GHADC-na dingtang Electoral Roll-ko tarina kamko a·bachengatgnok ine GHUA-ni ku·wattimgipa aro Executive Member parakataha.

Garo Customary Law (GCL)-ko ra·gatani bidingo janapatskaengon, je Committee-kon ia GCL-ni bidingo chanchidilna aro kamko ka·dilna donahachim, ia Committee, re·baenggipa salrango tom·aniko ong·atna miksongenga ineba Momin parakataha.