Bikonggre,June 10, 2026: Batanggimin somoio GHADC eleksin-o rorirangni susapaniko jegale, Garo Hills-ni Civil Society Organization-rang champenganiko dakani a·sel, jatgnini gisepo ding·chaogrike, so·sojengjeng ong·ani ja·man, a·bri jolrangona rorirangni skatang songo noko nape bading chiwalaniko champengna gita, NGO-rang, Nokmarang aro songni manderang apsan ku·monge, raka niamrangko donataha.

Uni gisepon, West Garo Hills a·jani Chibinang sepango donggipa Bikonggre songona rorirangni skatang re·bae bading chiwalaniko dakna am·enganiko champengsona gita tik ka·aha.

Bikonggre jolona rorirangni re·bae bading chiwalaniko dakna am·engani gimin, June 9 tarik Monggolbar salo Bikonggre songni manderang baksa Nokma-Sanirang aro dingtang dingtang NGO-ni dilgiparang apsan tom·e chanchirimanio Demdema Block-ni BDO Dr. Rikrak N. Marak, Dadenggre-ni SDPO Randa A. Sangma-ba bako ra·angpaaha.

Indake songni manderang baksa tom·e chanchirimanio sorkarini dingtang dingtang kamrang jedake, rama sorok taria, dollong rika skul nok rika aro gipin nangchongmotgipa kamrangko ka·na gitade, Nokmarangni dongimin niamo pangchake kamrangko ka·na gita on·gen, indiba a·bri jolona skatang niamgri re·bae bading chiwalaniko dakna ong·chongmotjawa ine jolo songdongenggipa manderang raka niamko donangaha.

NGO dilgiparang ba A·chik Matgrikrang Johny A. Marak aro Balkarin Ch. Marak, uamang A·chik jatni namgnina dakgrikdile, jail pattoko chipako man·enga, uni gisepon, maikai rorirangko skatang niamgri a·bri jolrangona re·bae bading chiwalaniko on·na man·gen, ineba sing·doataha.

A·chikrang anti-bajarrango dingtang dingtang bading chiwalnirangko dakengon, janggi tangani gadangba namen tang·doengaha, uni gisepon, rorirangko skatang re·bapilna on·genchimode, A·chikrang bang·a neng·nikanirangko chagrongna nanggen. Maina rorirang a·bri jolangona skatang re·bae bading chiwalenba, saniba jik deko seke katgen aro sakoba togie katgen, bang·bata changon, rorirang namgija kamrangko ka·e kata bang·aha, uni gimin, namen mikkrakna nangchongmotenga, ine tom·anio parakangaha.

Indake tom·ani bon·kamao sorkarini officer, chong·motan Demdema Block-ni BDO Dr. Rikrak N Marak, songni nokni manderang, Nokma Sanirang aro NGO dilgiparangni talataniko knachake, sorkarini kamde niam gita ka·genchimode, maming champengani dongjawa ine parakangenba, mittele mikkangchiba iandakgipa obostarangni bidingo agan-golpogrikna ba meeting ka·na nanggenchimode, apsan ku·monge kamrangko ka·angna kusi ong·begen ine aganangaha.