Dadenggre, June 11, 2026: West Garo Hills a·jani Dadenggre Civil Sub Division-ko, Sai Computers Limited-ni jako ra·a intal bijoli wata bijoli teng·a tik ong·srangja aro bill-rangko bang·bate sokatenga. Skango je bijolini bill-rangan, komie sokachim, una changgni bate bilrangko sokengani gimin bijoli jakkalenggipa manderang nangana bate bijolini bill-rangko gamna nangtokengani gimin ding·chaoe, June 11 tarik Bristibar salo Dadenggre Bajaro manderang jinma tom·e, bajaroni Block sepango donggipa MePDCL office mikkangone re·jomange jegalgrimaniko dakangaha.

Jinma tom·e re·jomana skang dingtang dingtang NGO dilgiparangni jinmana parakatani gitade, re·anggipa 2025 bilsini November ja intal, Sai Computers Ltd jako ra·a dipet, bijolini teng·a aro kimita salo aro walo channa ampilgija sisimsimani gimin, Dadenggre-ni MLA Rupa M. Marak baksa re·anggipa May 2 tariko Dadenggre Circuit House-o Sai Computers Ltd-ni officer-rang baksa tom·e chanchirimanio, namdapatna ku·rakchakahachim, indioba da·alonaba maming namdapataniko man·kujaenga ine parakataha.

Indake ong·engon, porikkana poraienggipa chatro chatrirang namen neng·nikaniko man·enga. Uni gimin, ia neng·nikaniko namatna gita, Sai Computers Ltd-ko ra·galsrange, MePDCL-an jako ra·pilchina dabiangtokaha.

Iani bidingo ru·utgijan, a·dokni Skotong Minister Conrad K Sangma-na chittiko sedoatgen, ineba jinma tom·anio parakangaha.

Indake, jinma tom·ani ja·mano, “Sai Computers Ltd-ko Dadenggre-o nangja, Sai Computers Ltd-ko ta·raken ra·galbo, MePDCL-kosa chingna nanga, Dadenggre-ko cha·boknabe, chingni dabianiko knachakjaode, jingjengataniko dontongjawa” ine jinma chrik a·boke dabiangtokaha.

Dadenggre jolo Sai Computers Ltd-ni kamrangara bijoli sironggasan ong·aija, indiba kam ka·gipa manderangba chu·ongja, je kam ka·giparangba kamtangko wate re·angani a·sel, kam ka·giparang chu·ongjaengja, maini a·sel indake ong·enga ineba sing·doangaha.
Uni gimin chu·onga gita kam ka·giparangko rakkina nanga ineba dabiangjolaha.

Ia tom·anio Dadenggre, Damal A·sim aro dingtang dingtang songrangoni sak ritchani ritcha manderang baksa dingtang dingtang NGO-rang, skulni chatro chatrirang, Nokmarang aro Senior Citizen-rang bak ra·angtokaha. Unbaksana joltango neng·nikaniko namdapatna ka·oksie mikron nikgijagipa manderangba re·jomanio bakko ra·angpaaha.