Tura, July 26, 2026: A·dokni dingtang dingtang sorkari department-rango Muster Roll (MR)-ni kamko ka·enggiparang mongsongbate, Public Health Engineering (PHE) department, Water Resources (WR) department aro Horticulture department, jabri (4) ong·angpiloba MR-rangngni man·gni dormaharangko on·kujaengani gimin, All Meghalaya Muster Roll Workers’ Union (AMMRPWU), July 20 aro July 25 tariko Shillong aro Tura-o tom·e chanchirimaniko dakaha.

Union-ni dilgiparang July 10 tarikon, PHE department-ni Chief Engineer (CE) aro Commissioner Secretary-ko Shillong-o gronge, Muster Roll-rangni man·na nangenggipa jagittamni dormaharangko on·china mol·molaha.

Union dilgiparangni mol·mola gitan, PHE-ni Chief Engineer April, May aro June jagittamni dormaharangko ia July jani gisepon on·gen, ine ku·rachakahachim. Indiba July ja bon·angpiloba, jagittamni dormaharangko on·kujaengani gimin, Union-ni dilgiparang July 20 tariko PHE-ni CE-na aro gipin chubata gadango kamko ka·enggipa officer-rangna sedoatenba, July 31 tarikna skang jagittamni dormaha baksa, April jao barigipa jagittamni VDA-ko chu·gimik on·ja ong·ode, re·baenggipa August 3 tarik dipet Shillong aro Tura-o jingjengataniko dakanggen ine parakataha.

Re·anggipa April jaoni July jaona jabri ong·piloba, a·dok sorkari MR-rangni dormaharangko on·kujaengani gimin, MR-rang namen neng·nikaniko chagrongna nangenga. Mitam sorkari department-rango MR ka·giparangna jaanti dormaharangko on·na man·ode, maini gimin PHE, WR aro Horticulture department-rango kamko ka·enggipa MR-rangni dormaharangko on·na man·skajaenga, ine Union-ni dilgiparang sing·doatenba, ia July jani 31 tarikna skang chu·gimik jagittamni dormaha baksa jagittamni VDA-ko on·ja ong·ode, Democracy-ni niam gita jingjengataniko dakanggen, ine AMMRPWU parakataha.

Union-ni dabianirangara, dormaha mangmangsan ong·ja.Indiba re·anggipa, 2025 bilsini November 14 tariko Cabinet-o ra·chakgimin, Group D Post-rango ta·rake senior RCW-ranglo gapatchina, bilsi 10 gapgipa MR-rangko ta·rake RCW-o segatchina, MR-rangko Category ge·bri (4), Unskilled, Semi-Skilled, Skilled aro Highly-Skilled-o bilsini kri bilsianti upgrade ka·china ba ra·dochina aro Retired ong·anggipa MR-rangni palo nokdangni manderangko Muster Roll-o rimnapchina ba rakkichina, Union-ni mongsonggipa dabiani ong·a.

Ia dabianirangko a·dok sorkari chu·sokate on·kujaskal jingjengataniko dontongjawa ine Union-ni dilgiparang parakataha.