Resubelpara, July 18, 2026: Ma·mong aro A·dok sorkarirang baksa ANVC aro ANVC-B dolrangni songgigrike soi ka·grikanio sorkarini ku·rachakgimin, dingtang dingtang Project-rangko ta·rake chu·sokatchina didiatenba, ua project-rangko BJP-ni State Vice President aro Tura-ni MDC Bernard N Marak-ni dilanichi, ma·mong aro a·dok sorkarirang baksa soi ka·grikanio bak on·pagipa manderang Bristibar salo North Garo Hills a·jaona re·ange niangaha.

Marak-ni parakatani gitade uamang, North Garo Hills a·jani Resubelpara Community Health Centre (CHC) aro Mendipathar Community College-o ong·enggipa kamrangko niangaha. Uamangni ua biaprangko niani salo, North Garo Hills a·jani Assistant Commissioner-ba dongpaaha.

Garo Hills-o lekka pora, an·seng baljokani, re·a doani aro dingtang dingtang kamrango namroro silroroaniko ra·bana songgigrikahani gimin ua kamrangko ma·mong aro a·dok sorkarirang baksa soi ka·anio dongpagipa manderang nieaha ine u·iataha.

Tripartite Agreement ba dolgittam songgigrikani Para 2.4-ni ning·o North Garo Hills aro South West Garo Hills a·jako songan baksana gital sub-division aro development block-rangko songanichi, Garo Hills-o sorkarini kamrangko nambatatna man·aha.
Lekka porani kamrangko nipilangengon, dolgittamni songgigrikanio, Captain Williamson Sangma State University, Engineering College, Architecture College, Nursing College, Horticulture College aro Medical College baksana Garo Hills-o dingtang dingtang college-rangko kulianichi lekka porani gadangko namdapatna niksamsoanirang donga ine Marak parakataha.

North Garo Hills a·jani Mendipathar Community College-ko niangengon, ua college-o chu·onga gita nokrang, skigiparang aro chatro chatrirangna asongchakanirang chu·ongjaengani a·sel chatro chatrirang, gipin biaprangchisa re·ange poraina nangenga ine BJP dilgipa parakataha.

North Garo Hills a·jao Higher Education ba chubata gadangrango skie ra·aniko nambatatna gita Resubelpara, Bajengdoba aro Kharkutta-o Community College-rangko kulichina gitaba, songgigrikanio soi ka·gipa dol didiangaha.

Kharkutta jolrango sorkarini kamrangko nambatna gita Kharkutta Block-ko Sub-Division-ona ra·doatchina ma·mong aro a·dok sorkarirang baksa songgigrikanio soi ka·grikgipa manderang didiangaha.

Resubelpara CHC-ko niangengon, ua Health Centre-o kam ka·giparang chu·ongjaengani a·sel, manderangna sanna bananirangko on·anio neng·nikanirangko chagrongenga ine parakatenba, Resubelpara-o rikenggipa palang ge ritchasa ba 100 bedded Civil Hospital-ko ia bilsini gisepon matchotatchina aro chu·gimik kamrangko matchotani ja·man kulichina gitaba, Tura-ni MDC didiangaha.

North Garo Hills a·jao gital kuligipa block-rango Gram Sevak-rang chu·ongkujani a·sel sorkarini dingtang dingtang kamrangko ka·anio neng·nikanirangko man·engani gimin, ua block-rango chu·onga gita Gram Sevak-rangko rakkichina BJP dilgipa didiangaha.