Phulbari, June 18, 2026: A·chik Dedicated Integrity Leaders (ADIL) Western Zone, Phulbari Bristibar salo, GHADC-ni Executive Member (EM) aro Haat Bajar/Market-ni Incharge Crozier Momin-ko gronge, Phulbari bajaro dokkan dakgiparangko Robibar salo chipatchina dabie, lekka sedoangaha.

ADIL Western Zone, Phulbari-ni President Jack Sangma-ni parakatani gitade, Assam aro Meghalaya a·dokni bang·a bajar antirangon, dokkanrangko chipachim, indiba Phulbari bajaro dokkan dakgiparangde, antio salsaba dokkanrangko chiptokjaenga.

Songni nokni manderang gisiko suk ong·jae janapatani gitade, dokkanrango jana kam ka·e cha·engipa manderang neng·takna gita salsaba somoiko man·jaenga aro bang·a dokkanrango kam ka·engipa manderang, Robibar salo salsa mangmang neng·takna chutti bi·genchimoba, mitam dokkan nokgiparang namrengesa dongaia aro dormahako katinasa am·aia ine parakataha.

Uni gimin, ADIL Western Zone, Phulbari bajarni dokkanrangko, nirok simsakengipa, Garo Hills Autonomous District Council (GHADC)-ni dilgiparangko mol·molatenba, taraken iani bidingo ja·kuko de·china aro antio salsa mangmang, Robibar salo dokkanrangko chipe chutti on·china ADIL Western Zone, dabiangaha.

Jedakode, kam ka·e cha·engipa, Kristian manderang aro bang·a songni nokni manderang neng·takna gita cholko man·pagen, ineba, ADIL Western Zone, janapataha.