Chokpot, June 18, 2026: South Garo Hills a·jani ning·o donggipa Rongrikimgre skulni chatro chatrirang, Dareng chibimako ringo chobatesa poraina nangengani gimin, uamangni janggina namen kenchakani ong·enga, ine Rongrikkimgre GDC elakkao susaenggipa Independent candidate Clinton R.Marak suk ong·gijaniko parakataha.

Rongrikkimgre-o songdongenggipa manderang, mikka wachi a·bachengahaon, namen dal·begipa dukni ong·ronga, maina Dareng chibimako batsotna jal·lang ba dollong dongjani a·sel jajrengna nangani ong·enga. Jal·lang dongjani a·sel, bi·sarang Rongrikimgre Secondary Skulo salanti poraina gita chongipa ringo Dareng chibimako ringosa ga·batna draatako man·enga. Mikka wachini somoio Dareng chibima dal·na ta·rakani a·sel, namen kenbeani ong·a, ineba parakataha.

Skul poraienggipa chatro chatrirangni janggina maming naljokatani ba chel·chakani chol dongja aro ia obosta salantian bi·sarangni janggina kenchakani ong·enga ine janapatenba, “Anga chanchia, ia obosta ong·aniara, RTE Act, 2009-ni ning·o lekka poraniko chel·chakna, (Right to Safe Access to Education)-ko pe·ani ong·enga, ma·a paarang an·tangtangni bi·sarangna lekka poraniko on·na aro bi·sarangko chel·chakna draatako man·enga. An·chingni Prime Minister Narendra Modi-ba, bi·sarangko lekka poraianio dal·gipa ong·atna gita mongsonggipa bak ong·a ine aganahachim” ine Marak parakataha.

Meghalaya a·doko lekka poraianina skanggipa biapko on·na nangchongmotenga ine an·chingni Skotong Minister-ba pil·ni pil·an agan parakatahachim. Indiba, Meghalaya a·doko songadamni bi·asarang lekka poraniko man·na gita an·tangtangni janggina maming naljokani gri, salanti kenbegnigipa chibimako ringo chobate skul re·na nangenga. Uni gimin, niam gita, a·jani bil gnanggiparang, (district authority-rang) aro a·dok sorkari, ta·raken ia neng·nikanina gisiko nange jako ra·enba, nirokatchina Marak mol·molataha.

Jedakode songni nokni bi·asarang maming champengani gri lekka poranina cholrangko man·pagen, ineba Marak parakataha.