Resubelpara, May 29, 2026: Leader of Opposition (LO) Dr. Mukul M. Sangma, Bristibar salo North Garo Hills a·jani Resubelpara, Chidaret Koksi A·kingo rikenggipa 100 bedded ba palang ge 100 chakgipa Civil Hospital-ko department-ni official-rang baksa re·ange sandirokaniko dakangaha.

Palang ge 100 chakgipa (100 bedded) Civil Hospital-ko rika matchotahaoba, da·onan a·bachengatkuja, uko re·anggioa 2025 bilsini November ba December jaon a·bachengatani ong·achim, indiba Human Resources (HR) Medical Post-rangko sanction ka·kuja aro Hospital Management Society-ko songkuja aro unbaksana bijoli line aro chi pipe line-rangko salkujani gimin a·bachengatna gita man·kujaenga ine Dr. Sangma ma·siaha.

Resubelpara 100 bedded Civil Hospital-ko rikna gita Chidaret Koksi A·kingni Nokma, bigha 300 a·arangko on·ahachim, indiba bigha 300-oniko bigha 136-rangkode, Nokma dingtang dingtang manderangna palahani gimin, Doba A·pal, Daram, Tapa, Rongrong, Raja A·pal, Area Development Committee aro songni manderang mikangchi agreement-o pangchake rikna miksongengipa. Chidaret Medical College aro Nursing College-ko rikna chu·ongjawaha ine tom·anio parakangaha.

Sorkarina on·gimin a·arangko palani bidingo District Revenue Department aro District Administration-ba inquiry ka·manaha ine reportko on·aha.
Bigha 300 a·arangko jatni namgnina a·jani silroroanina sorkarina on·manaha aro batangimin somoion, agreement-o pangchake a·a nokgiparangni ma·drang sakgittamna permanent kam ba service regularised ka·e on·manaha.

Uni gimin sorkarina on·gimin a·arangni sima arirangko name dake amsandienba, ja·ku de·na nangenga, ian sorkarini dakna nanggni daito ong·a ine Area-ni Development Committee aro Department-ni officer-rangko Dr. Sangma didiangaha.