Shillong, May 22, 2026: An·seng baljokanina aro sanna bananiko skie ra·na, chong·motan (Medical)-ko poraina admission-ko ra·na adita salrangna skang ong·atgipa NEET UG 2026 porikkani lekka (paper) leak ong·ani ja·man porikkako den·galpilahani gimin da·o gital dake porikkako ra·piltaianio, NEET porikkako sepiltaina sienggipa chatro chatrirangna pilak nanga korosrangko on·skachina Meghalaya Pradesh Youth Congress (MPYC), a·dok sorkario dabiangaha.

Iani bidingo a·dokni Skotong Minister Conrad K Sangma-na see u·iatenba, adita salrangna skang ong·atna sigipa NEET UG 2026 porikkako den·galpile, da·o gital dake porikkako ra·piltaina siengani gimin chatro chatrirang neng·nikanirangko chagrongna nangenga ine MPYC-ni President Timjim K Momin parakataha.

Momin-ni parakatani gitade, NEET UG porikkako re·baenggipa June-ni 21 tariko ong·atna tik ka·taiaha, indiba ua porikkako sepiltaianio bang·bata chatro chatrirangan neng·nikanirangko chagrongna nangtokenga.

“Chatro chatrirang, mongsongbate songadam nokadam aro chel·a biaprangoni re·bae porikkako sena nanggipa chatro chatrirang, NEET UG porikkako den·galpilahani a·sel pilakni gitan neng·nikanirangko chagrongna nangenga. Da·o ua porikkako gital dake ong·attaianio, mitam chatro chatrirangde, tangka paisarang chu·onga gita dongpajae, porikkako sepiltaianio neng·nikanirangko chagrongtokenga,” ine MPYC President parakatenba, chatro chatrirangna NEET UG 2026 porikkako sepiltaianio, korosrangko dakchake on·skachina a·dok sorkariko didiataha.

Adita salrangna skang ong·atna tik ka·gimin NEET UG porikkako seanio bang·bata chatro chatrirang, re·a-doani, donga-cha·ani aro dingtang dingtang korosrango tangka paisarang bon·na nangahani gimin, an·tangtangni gamchatbegipa somoirangko, indin bon·atna nangaha ine janapatenba, da·o NEET UG porikkako ra·piltaianio chatro chatrirang, korosrang bon·na nangskajana gita tangka paisarangko dakchake on·na nanga ine MPYC dabiangaha.

“Chatro chatrirang, tangka paisani gita neng·nikanirangko man·na nangengani a·sel an·tangtangni poraiani cholrangko gimaatjana gita Meghalaya sorkari, chatro chatrirangna pilak nanga korosrangko on·e dakchakgen ine chinga ka·dongenga,” ineba Momin parakataha.