Williamnagar, May 20, 2026: Social Media-rango
me·chikrangni kosako kragija kattarangchi saie-inteke gipatgipa East Garo Hills a·jani Williamnagar jolo donggipa Achak Jangkigre songni Newbard M. Sangma-ko Williamnagar Pulis rim·aha ine parakataha.

Newbard M. Sangma-ko Bethuel ineba mingkalakachim, uni kosako Williamnagar PS Case No. 21/2026 U/S 75(IV(3)/79 BNS, R/W Section 67 IT Act, 2000-ni ning·o pangchake mamlakp segataha.

Ua an·tangni Facebook Account aro YouTube Channel-o kragija kattarangchi me·chikrangni kosako changni chang ine-sole roanirangko kobor man·soani ja·man, am·sandianiko dakaha ine Pulisrang parakataha.

Facebook-o uni upload ka·giparangara Section 75 (IV) (3), 79 BNS aro IT Act, 2000 R/W Section 67-ni ning·o dongimin niamrangko pe·aha.

Information Technology Act-ni kosako upload ka·e, kragija kattarangko gipate Social Media-rango me·chikrangko ine-sole roaniara namen kragijani ong·a ine East Garo Hills a·jani Pulisrang u·iataha.

Je manderangan indakgipa sinjetaniko man·genchimode, pulisrangna u·iatchina didiataha. Unbaksana National Cyber Crime Reporting Portal (NCRP)-ni gitaba badi ka·na man·gen, jean Online gita sinjetaniko man·giparangni, Child Sexual Abuse Material (CSAM) aro Cyber Blackmail-rangko ra·chakgipa a·dam ong·a ine East Garo Hills a·jani Superintendent of Pulis (SP) SA Rynjah parakataha.