Resubelpara, May 14, 2026: North Garo Hills a·jani Dainadubi jolrango donggipa dingtang dingtang bajar antirango niamgri bading chiwalenggipa gipin jatrangni TNT licence-rangko namedake sandianirangko dakchina dabie segipa chittiko Dainadubi jolni nangrimgimin NGO-rang, May 14 tariko GHADC-ni CEM Dhormonath Ch.Sangma-ko gronge on·angaha.

NGO-rangni parakatani gitade, Dainadubi jolo bading chiwalenggipa gipin jatrang dingtang dingtang bajar antirangona aro songrangona skatang ra·bae bading chiwalanirangko dakenga aro uamango Nokmani see on·gipa lekkarang aro GHADC-ni on·gipa TNT licence-rang dongja.

Iandake, Dainadubi jolo donggipa bajar antirango niamgri bading chiwalani a·selan, bang·a A·chikrang bading chiwale janggi tangna gita cholrangko man·jaenga. Uarangsan ong·aigija gari para salgipa gipin jatrang, District Council-ni on·gipa TNT licence-rang gri, skatang Garo Hills-ona napbae gari para saltokenga ine NGO-rang parakatenba, uamango nangchongmotgipa lekkarang aro TNT licence-rang dongama, dongja, namedake sandichina GHADC-ni CEM-ko didiangaha.

Uandake, niamgri bading chiwalgiparangko nirok sandigija donani a·selan, A·chikrang a·doktang chigatango bading chiwale janggi tangpana gita cholko man·jaenga. Indiba uarangko namedake sandienba, TNT licence donggijagiparangko niamgita bading chiwalna on·jaode, A·chikrangna namen dakchakbeani ong·gen aro bading chiwalna namgipa cholrangko man·pagen, ine NGO-rang parakataha.

Uni gimin, ta·raken niamgri bading chiwalenggipa manderangoniko TNT licence-rangko sandina nangchongmota aro niamgri A·chik a·songo bading chiwalgiparangni kosako rakgipa ja·kurangko de·na nanga ine NGO-rang dabiangaha.