Tura, May 14, 2026: Tura Dakopgre-o P.A Sangma Stadium-ko rikanichi Rongkhon Songgital-o songdongipa manderang namen neng·nikaniko chagrongna nangenga ine gittimni manderang u·iataha.

P.A Sangma Stadium-ko rikanirang matchotgenchimoba, gipin dingtang dingtang rika cho·anirangko dakuengani gimin, chu·gimik jabolrang aro a·a cho·ani a·kirang mikka waani somoio Rongkhon Songgital-ona re·gipa ramaona joljolrang jokbae, sorokrango chi skonge, rama re·na namgija, chibolrara ong·atenga.

Mongsongbate, salanti skul re·ruraenggipa bi·sarang ja·achi re·anio neng·nikbataniko man·enga aro namen mandikaniko on·enga, ineba u·iataha.

Iandakgipa obostako chagronga, bilsi gittam mang ong·engaha, iani gimin, darangba nirok simsakaniko dakjaenga, Stadium-ko rikanirang sorok tarianirang giminkon, ‘Smart Town Project’-ko ra·gate, sorokna angipa paver-rang, anna ru·utgijan giloke nosto ong·tokaha aro mikka wachini somoio sorokrangona a·kirang chi baksa jokbae, Rongkhon Songgital-o songdonggipa manderang re·a doanio namen, neng·nikaniko man·enga ine gittimni manderang parakataha.

Walni somoio dal·dalgipa truck garirang, Edenbari gita napbae, ia ramarangko re·ruraengani a·sel, sorokrango nosto ong·batenga, ine gittimni manderang suk ong·gijaniko parakataha.