Shillong, May 14, 2026: Shillong NEGRIHMS-o MBBS passed ka·gipa Dr Tanvi Raksam Marak Delhi-o ong·atanggipa, Miss Grand India 2026-o 2nd runner up-ko man·aha.

Miss Grand India 2026-ni Grand Finale-ko May 12 tariko Delhi-ni Talkatora Stadium-o ong·atangaha. Uano India-ni dingtang dingtang a·dokrang aro Union Territory-rangoni sak 30 mang bak ra·angaha. Uamang gimikan a·doktangtangni Miss Grand-ko man·giparang ong·a. Susaanio uamang a·doktangtangko represent ka·aha.

Uandake Dr. Tanvi R. Marak-ba Meghalaya-ko represent ka·aha. Indake sak 30 me·chikrangoni Dr. Tanvi Marak, top 6-ona sokange, susaanio 2nd Runner Up-ko man·aha.
Unbaksana ua Miss Elegant aro Miss Cultural Wear Award-koba man·aha.

Uan A·chik jatna, Meghalaya a·dokna aro North East gimikna mikkim rasongko chabeani ong·a.
Una skangba Dr. Tanvi Marak 2018 bilsio Miss Cherry Blossom-ko man·aha, Sunsilk Mega Miss North East-ko 2019 bilsio man·aha, Miss Meghalaya-ko 2019 bilsio man·aha, VLCC Femina Miss India Meghalaya-ko 2020 bilsio man·aha aro Miss Grand Meghalaya-ko 2026 bilsio man·aha.

Dr. Tanvi R Marak, All India Garo Union-ni President, Elbarth Marak aro Adriana R. Marak-ni demechik ong·a. Uni ba·rimarang sak 4 gnang. Abitang sakgni aro nogipa saksa. Uamangni nokdango poraianirang abitang skanggipa Tenaz R. Marak MA & LLB, gnigipa Nafisa R. Marak MBA aro nogipan Dr Taziana R Marak MMBS-ko NEGRIHMS-o passed ka·aha. Dr. Tanvi Marak, RipRap Band-ni mingsinggipa Rockstar, Browny R. Marak-ni namchiktang je·et ong·a.