Tura, May 12, 2026: Garo Hills Autonomous District Council (GHADC)-o kam ka·giparangni dormaharangko da·alonaba on·kujaengani gimin Sombar salo, Tura-ni MDC aro Bharatiya Janata Party (BJP)-ni State Vice President Bernard N Marak, kam ka·giparangni dormaharangko ta·raken chipatchina a·dokni Deputy Chief Minister aro District Council Affairs (DCA) Minister Prestone Tynsong-ko didiataha.

Marak-ni DCA Minister-na sedoatgipa chittio parakatani gitade, ANVC aro ANVC-B dolrangni songgigrikanio aro re·anggipa 2025 bilsini September 26 tariko State Level Monitoring Committee-ni tom·anio, GHADC-o kam ka·giparangna somoi gita dormaharangko on·na tik ka·ahachim, indiba ia songgigrikaniko chu·sokatjani a·sel, sorkarini kakket ong·gijaniko mesokani ong·enga ine janapataha.

“Songgigrikanio ku·rachakgiminko mande ra·na nanga maina, GHADC-o kam ka·giparangni dormaharangko somoi gita on·jani a·selan bang·a nokdangrangan janggi tanganio neng·nikaniko man·a baksana sorkarini ku·rachakaniko ka·dongna man·gijani ong·a,” ine Tura MDC parakataha.

GHADC-o kam ka·giparangna somoi gita dormahako on·jani a·selara, kam ka·giparangni jingjengatengmiting somoio Peace Committee aro Sub-Committee-ni kam ka·giparangna ka·dongataniko on·aniara togiani gita ong·a, ineba Marak parakataha.

“GHADC-o kam ka·giparangna ESROW Account gita dormaharangko on·na ku·rachakahani gimin kam ka·giparang aro ia ku·rachakanio pangchake ka·dongenga, uni gimin ia ku·rachakaniko chu·sokatchina nang·ko mol·molenga,” ine Marak, a·dokni Deputy Chief Minister aro DCA Minister Prestone Tynsong-na sedoatgipa chittio janapataha.