Tura, June 20, 2026: Rajabala-oni Selsella gita Garobadha–ona rama taria matchotani bakan nosto ong·ani gimin, PWD Department-ni Official-rang aro Phulbari-ni NPYF ua ramako namen tariaha ine parakataniko, A·chik State Peoples’ Front (ASPF) HQ Tura, raken jegalataha.

Re·anggipa June 14 tariko Nokma-rang aro songni manderang rama taria matchotani ru·utgijan, nosto ong·ahani gimin, badi ka·anirangko man·soani ja·man, ua ramako nina re·angon, gital taridaldal ramako jakchi akchrakna man·aha ine ASPF-ni Chief Organizing Secretary Raksim Marak parakataha.

June 16 tariko, Phulbari-ni NPYF aro PWD Department-ni Official-rang rama tariako re·ange nienba, konta 72 ong·kujani a·selsa repigimin ramako akchrakna man·enga aro ian manderangni matnanganisa ong·aia ine aganaha.

Iani bidingo songni Nokmarang aro NGO-rang, June 18 tariko rama tarigiminko re·ange nion, konta 96-ni ja·manoba ua ramako jakchi akchrakna man·aia aro ramarang a·klok dake, chirang jokprake tarigimin ramarang anti gni ba anti gittamni gisepon nosto ong·aniko nikna man·aha ine Marak aganaha.

Indake ong·engon, songdongenggipa manderangni neng·nikaniko ta·rake nirokatchina dabiangenba, ua rama tariani bidingo ning·tue am·sandianiko dakchina aro contractor ba company-ni kosako rakgipa ja·kuko de·china ASPF, a·dokni Skotong Minister Conrad Sangma-ko didiataha.