@ghdnews.in@

Shillong, February 4, 2026: Indore songjinmao bading chiwalgipa Raja Raghuvanshi-ko Sohra jolo ka·saninggija dake so·otanina rim·ako man·gipa koidi sakgnini kosako chu·onga gita sakkirangko man·jae, uamang sakgniko watpilaha.

Raja Raghuvanshi-ko so·otanio, sakkirangko kimitani gimin rim·ako man·gipa Balbir Ahirwar aro Lokendra Singh Tomar-ni kosako bon·kamgipa investigation report-ko on·ani ja·man, jakgitel wataha ine Mongolbar salo pulisrang parakataha. Ua koidi sakgnina, re·anggipa bilsini July jao Shillong kachari, jaminko on·ahachim.

Iani bidingo sing·sandiaton, Raja Raghuvanshi-ko so·otani bidingo sandichengmiting somoio obostani kri aro sandirokanio man·ani kri ua mande sakgniko rim·aha ine East Khasi Hills a·jani SP Vivek Syiem parakataha.

Indake ong·genchimoba, ua manderango sing·sandion, uamangni kosako matnanganirang maming sakkirangko man·dapjaha ine SP parakataha.
Ia case-na pulisrang, ua somoion, gnigipa chargesheet-ko ka·aha.

Sakkirangko nisie galanina rim·ako man·gipa sakgittam manderangoni, gam jinrangko chalaienggipa Silome James-kode charge sheet ka·aha aro da·o uko kachari bichal ka·angkugen.

Pulisrangni u·iatani gitade, Silome James ia mamlo matnanga man·gipa Vishal Singh Chauhan-na Indore songjinmao nok para on·ahachim.

Ia sakgittam manderangko Special Investigation Team (SIT), re·anggipa bilsini June 26 tariko Madhya Pradesh a·dokoniko rim·enba Shillong-ona rim·baaha.

Indake, Raja Raghuvanshi-ko so·otanina matnangako man·giparangoni mongsonggipa Sonam Raghuvanshi-kode judicial custody-o donkuenga. Uni jaminna dorgasto galako kachari ra·chakjaha.