Tuea, June 15, 2026: Phulbari-oni Rajabala-ona dakanggipa National Highway (NH-127B) rama, jekon skango AMPT rama ine mingachim, ua ramani obosta namjabatroroengahani gimin, ADIL Western Zone (WZ), Phulbari suk ong·gijaniko parakatenba, ua ramako somoi gita matchotate on·china rama tarienggipa contractor aro a·dok sorkariko didiataha.

ADIL-WZ-ni u·iatani gitade, Phulbari-oni Rajabala-ona dakanggipa ramako da·o tariengoba, ia ramako ta·rake tarijaengani gimin ia rama gita dingtang dingtang bosturangko salruraenggipa truck garirang re·ruraengani gimin, ia ramarang ta·raken nosto ong·pilengaha..

“Ia rama gita ma·manti bosturangko salgipa truck garirang, dongimin niamna bate ton 70 ba 80-mang ong·pile bosturangko salruraengani a·sel ramarang, iandita garirangni jreako amchakjaenga. Bosturangko nangana bate gatenba, salruraengani a·sel ramarang ta·raken nosto ong·engaha aro ramako taria changantian, adita sal somoirangni gisepon a·kolrara dakako nikpiltaina man·enga. Ramarang ta·raken nosto ong·pilengani a·sel salanti kam nangana re·ruraenggipa manderang aro jolo songdongenggipa manderang neng·nikanirangko man·tokenga,” ine ADIL-PWZ-ni dilgiparang parakataha.

Indake ong·engon, ramarang nosto ong·na man·jana gita, ia ramarangko ta·raken tarichina aro somoi ra·chae donggija, ta·raken matchotatchina, ADIL-WZ, rama tarienggipa contractor-rang aro sorkari official-rangko didiataha.