Tura, Oct 13, 2025: West Garo Hills a·jani pulisrang dondikgija sandirikkitanirangko dakengon, pekgipa samrangko badingsrukgipa sakgni manderangko rim·na gita man·aha. Uandake West Garo Hills a·jani Anti Narcotics Task Force (ANTF) sandianirangko dakangaha.

Garo Hills-o pekgipa samrangko badingsrukgipa sakgni manderang Phulbari-oni Tura-ona pekgipa samrangko ra·baenga ine koborko man·soani bakan ANTF, Rongram Pulis Outpost-ni ning·o donggipa Te·bronggre songni Soil Compound jolo Naka checking-ko dakanio sakgni manderangko rim·na man·aha ine West Garo Hills a·jani Superintendent of Pulis, Abraham T Sangma parakataha.

Uandake sandianiko dakengmiting somoio moto-rcycle bolsa (AS-21B-2847)-o Johnsbirth R. Marak aro Chayang Ch. Marak sakgni manderangko dongdipataha. Johnsbirth R. Marak-oniko gram 1,106.105 Senspa+ni ge 2,873 Capsule-rangko man·aha aro Chayang Ch. Marak-oniko gram 2.095 Senspa+ni ge 7 Capsule-rangko man·aha. Uamang sakgnikon ua biapon rim·aha.

Unbaksana October 11 tarikoba, West Garo Hills a·jani ANTF, Patharkata songni Rakizul Sheikh-ni nokoniko am·sandianiko dakaha. Unon ge 122 gitchakmrang dakgipa tablet-rang baksa, Tuscorex Cough Syrup-ko botol te 10-o 1000 ml aro Syndex Plus-ni ge 6,022 Capsule-rangko man·aha.

Uni gimin songdonggipa manderang mikkrake dongchina aro songo noko saoba drugs badingsrukgipa aro jakkalgiparangko nika ong·ode, bakan sepangbatgipa Pulis Station, Pulis Out Post, Pulis Beat House aro Pulis Control Room, Tura-ona ia
+918837423053, +917005530510, +919089199064-ona phone ka·e, u·iatchina pulisrang ge·etaniko on·ataha.