Shillong, Nov 3, 2025: Garo Hills-o bobil dake chakattaigipa, Garo National Liberation Army-Regroup (GNLA-R) dolni manderang, South West Khasi Hills a·jani Indo-Bangla sima ari jolrango, bading chiwalgiparangna tangka dabiani lekkarang baksa ka·mikkenatanirangko on·na a·bachengaha.

Iani bidingo kobor ra·timgiparangna talatengon, GNLA-R dolni bimingo gong lak 5.5 tangkarangko dabie, bading chiwalgipa mande saksana chitti on·ataha ine October 28 tariko, Ranikor Civil Sub-Division ning·o donggipa Nonghyllam Pulis Station-o badi ka·ako man·soaha ine South West Khasi Hills a·jani Superintendent of Pulis (SP) B. Jyrwa parakataha.

Badi ka·gipao janapani gitade, ua mandeko GNLA-R dolni manderang, phone ka·ate ka·mikkenatrongachim ine Jyrwa aganaha.

Indake badi ka·anio pangchake, Intelligence-oni u·iataniko man·soani ja·man, Ranikor Circle-ni pulisrang, Mawkyrwat Pulisni Special Cell baksa, South West Khasi Hills a·jao donggipa Upper Rajapara songoni bilsi 25 ong·gipa Mann R Marak-ko rim·aha ine SP parakataha.

Ua mandeko sing·sandion, uni parakanio pangchake pulisrang, adita salrangni gisepon bilsi sokkugijagipa chadambe saksako man·chape gimik sakbri manderangko rim·dapaha ine SP parakataha.

Rim·a man·gipa sakbri manderangara, Upper Rajapara songoni bilsi 18 ong·gipa Marson R Marak, bilsi 27 ong·gipa Babulin D Sangma, Ranikor Civil Sub-Division-ni ning·o donggipa Mulapat songni bilsi 20 ong·gipa Tartus N Marak aro bilsi 16 ong·gipa chadambe saksa ong·a ine Jyrwa aganaha.

Ua manderangara, GNLA-R dolni member-rang ong·ama ong·ja aro GNLA-R dolni gipin manderang jak dongama dongja, uko ma·sina pulisrang, sandianirangko dakkuenga ineba SP parakataha.