Tura, Nov 21, 2026: Garo Hills Autonomous District Council (GHADC)-ni constituency-rangko gital dake sima salpiltaianio gitcham, Shyamnagar GHADC Constituency-ko ra·galna miksongenga ine koborko man·ani ja·man, Phulbari jolni nangrimgimin NGO-rang jekai GSU, FKJGP, AHAM, ASPF, AYWO, ADE, ADIL, CEPARD aro ACHIK jegalatenba, Shyamnagar constituency-ko ra·galgenchimode, Phulbari Legislative Assembly Constituency gimikonin darangba District Council-o member ong·pana man·jawaha ine jajrengsoaniko parakataha.

Shyamnagar GHADC Constituency-ko ra·galna miksongenganiko NGO-rang jegalatengon, da·o dipet iani bidingo official-oni maming u·iatanirangko man·soa dongkujaoba, ian Phulbari jolrango songdongenggipa manderangna jajrenganiko ra·baenga ineba parakataha.

Shyamnagar GHADC Constituency-ko ra·galahaode, Phulbari jolrango GHADC-ni seat ge·saba dongjawaha aro Rajabala LAC-osa seat ge·gni dongskagnok ine janapatenba, Phulbari LAC-ni ning·o donggipa manderangna jajrengani ong·enga ine NGO-rang parakataha.

GHADC-o Shyamnagar constituency-an gitchambatsranggipa constituency-rangoni ge·sa ong·a aro Phulbari LAC-ni ning·o donggipa manderang, joltangni MDC-ko seoke watatna aro jolo namroro silroroaniko ra·bana chol ong·achim ine NGO-rang parakataha.

Ia constituency-oba, GHADC-na dingtang electoral roll-ko tarie, GHADC election-o susagipa candidate-rangna Scheduled Tribe (ST) Certificate-ko dabie chu·sokatanio bak on·pagipa ong·a ineba Phulbari-ni NGO-rang parakataha.

GHADC-ni constituency-rangko gital dake sualtaianio, darangnaba nangchakeani gri jinmana donnuani gri ong·na nanga ine NGO-rang parakatenba, Shyamnagar constituency-ko ra·galna miksonganirang dongbebeama dongja, iani bidingo ta·raken talataniko on·china aro ia constituency-ko ra·galjachina NGO-rang, GHADC aro a·dok sorkario dabiangaha.

Delimitation Committee-ni report-ko bon·kame tik ka·na skang, dingtang dingtang songni Nokmarang, Gaonburarang, songni dilgiparang aro NGO-rang baksa tom·e chanchirimaniko dakchina Phulbari NGO-rang dabiangaha.