Gasuapara, Nov 22, 2026: Re·anggipa April jani 20 tarik walo mikka balwa ta·rake stil ondapanichi, South Garo Hills a·jani Gasuapara C&RD Block-ni ning·o donggipa Tojananggre songo bang·a nok jamrang nosto ong·atako man·gipa nokdangrang da·onaba sorkarini maming dakchakaniko man·kujaenga ine u·iataha.
Koborna u·iatani gitade, sorkarini kangal cholgri manderangna on·enggipa, PMAY scheme-oniko nok rikna on·pachina gitaba bimingrangko on·e, lekkarango gapatahachim. Indimangba da·onan man·kuja aro relief-ni GCI sheet ba tin-ko suala tikgijagiparangna ja·mano on·taigen ine aganachim, ukoba da·ona tekan on·kuja.
Una agreba, tin ra·gijagiparang tangkako ra·skana man·gen ineba aganachim, ukoba da·onan on·kuja ine songni manderang suk ong·gijaniko parakataha.

