Tura, June 23, 2026: Garo Hills Autonomous District Council (GHADC)-ni bimingo tol·e tarigipa lekkarangko jakkale cha·bokgipa manderangko rim·a man·aha ine West Garo Hills a·jani Superintendent of Pulis (SP) Abraham T Sangma parakataha.

Re·anggipa May 7 tariko togia man·gipa mande aro GHADC Secretary-ni badi ka·anio pangchake, West Garo Hills a·jani Pulisrang am·sandianiko dakenba, June 11 tarik walni 11 bajio cha·boke cha·anio jak donggipa manderang dingtang dingtang biaprangoni Tura-ona re·baaha. Togie cha·gipa manderang bading chiwalaniko togina aro kam ka·ani bosturangko ra·bae on·na gita Gujarat-oni re·bae, Guwahati-o jinma gronggrike tom·aniko kobor man·soaha ine SP parakataha.

SP-ni u·iatani gitade, West Garo-ni Additional Superintendent of Pulisni dilachi pulisrang, Guwahati-ona June 12 tariko re·ange, am·sandianiko dakanio Guwahati-ni Greenwood Hotel-oniko sak 5 chanchichipgipa manderangko rim·aha aro West Garo Hills-ni OC aro CI Tura (Sadar)-ni dilanio sakgipin dos dakgipa Reeturaj Kaundiya-ko Assam Tejpur-oniko rim·na man·skaaha.

Rim·a man·gipa manderangara bilsi 46 ong·gipa Assam-Kamrup Patharkuari-ni Narendra Singh, bilsi 53 ong·gipa Guwahati Geetanagar-ni Dip Hajarika, bilsi 58 ong·gipa Assam Bongaigaon-ni Kokkal Dutta, bilsi 45 ong·gipa Haryana Faridabad-ni Taposh Mukherjee, bilsi 40 ong·gipa Assam Golaghat-ni Mridupaban Gogoi aro Assam Sontipur Tejpur-ni Reeturaj Kaundiya ong·a.

Pulisrangni rim·a man·gipa manderangko sing·sandion, tangka gong hajal 50-ko GHADC-ni Om Sai Sarees, Surat-na kam ka·na on·gipa Non-Tribal Licence-ko tol·e tarigipako man·aha ine SP aganaha.

Am·sandianiko dakanio rim·a man·gipa manderang saksa mandeoniko tangka lakh 3-ko cha·boke ra·aha, unbaksana kror 46-ni kamko ka·anio 4% Commission-ko cha·bokna miksonge dongengachim ineba SP aganaha.

Indake, rim·a man·gipa manderangni kosako Tura Pulis Station-o mokordomako segataha. Kamrangko ka·na tender on·anio lekka, licence aro sorkarini on·gipa lekkarang kakket ong·ama ong·ja, Supplier-rang, contractor-rang aro trader-rangko namedake chek ka·china, Pulisrang ku·patiataha. Uandakgipa Kamrangko ka·atna skang saoba, tangka paisarangko on·chengchina bi·ode, sepangbatgipa Pulis Station, Out Post, Beat House ba Pulis Control Room (PCR)-ni mobile numbers, 8837423053, 7005530510, 9089199064-ona call ka·ate sing·atchina SP didiataha.