Tura, June 26, 2026: West Garo Hills a·jani ning·o ga·akgipa, Gambegre constituency-ni ning·o donggipa, A·dugre-oni An·chenggre-ona dakanggipa ramako skanggipa part aro An·chenggre Songma-oni Chenggapara-ona dakanggipa ramako gnigipa part dake, 2023 aro 2024 bilsirango black topping on·gipa PMGSY ramarang bilsi 5 ong·gijan nosto ong·tokaha ine A·chik Holistic Awakening Movement (AHAM) Bolori Unit, parakataha.

AHAM Bolori Unit-ni Secretary Emash Marak-ni u·iatani gitade, ia ramarang namjani a·sel, skul aro college re·gipa chatro chatrirang, office-o kam ka·giparang aro dingtang dingtang nanga kamrangna salanti re·ruraenggipa manderang namen neng·nikkaniko man·tokenga.

Batanggipa, 2000 bilsio dongimin niam gita ia tarigimin, PMGSY ramarangko bilsi bongana kingking nosto ong·arangko niroke taripilna aro kam ka·e on·na nangachim, ine Marak parakataha.

Indiba da·alona kingkingba ia kamko man·gipa contractor-rang changsa tariani ja·mand, nirok simsakgija galchipe donaha. Uni gimin, bil man·gipa a·dok chigani dilgiparang ia ramako ta·rake nirokkatpachina AHAM Bolori Unit, a·dok sorkariko didiataha.