Tura, Oct 8, 2026: Garo Hills Autonomous District Council (GHADC) election-ko ra·dodapgija ja 6-na ra·dogipa bon·ahaode, ta·raken election-ko ong·atchina warachakgipa dolni MDC-rang didiattokaha.

Iani bidingo Tura-ni MDC Bernard N Marak-ni janapatani gitade, jadokna election-ko ra·doatani da·o October 18 tariko bon·engaha, uni ja·mano delimitation aro Special Intensive Revision (SIR)-ko pa·sike election-ko ra·dona chanchienga. Da·alo Separate Electoral Roll (SER) ba gital electoral roll-o pangchake election-ko ong·atna ja·manchakatako man·gnok.

GHADC election-ko ra·dororogipa somaio indita Garo Hills-na sokbagipa tangka paisarangko da·alo party ge·sani manderangsan contractor-rangchi oke ra·enga aro Utilization Certificate (UC)-ko on·a man·jaenga. re·anggipa bilsini 15th Finance-niko Utilization Certificate chu·gimiko on·na man·jaenga. Uandake election-ko ra·dororoania badiaba member-rangnasan namggni ong·enga, indiba jatna aro Garo Hills-nade maming namgni ong·jaenga. Uni gimin je obosta ong·oba election-ko ra·dogija, election-ko ong·atchina Tura-ni MDC Bernard N Marak a·dok sorkario dabiangaha.

GHADC-ni gitcham Deputy CEM, Nikman Ch Marak, MDC-rangko bilsi 5-nasan seoke bilsi 5-ni gisepo kam ka·china watatani gimin, term bon·ahaode election-ko ra·dodapgija ta·rake election ong·ataniko nangnika. Uni gimin election-ko ong·atna nanga. Da·alo ja 6-na ra·dogipa October 18 tariko bon·engaha, uni ja·man election-ko ra·dotaia ong·ode, niamgri Member ong·a gita dakenga. Uni gmin election-ko ong·ate je gital re·bagipa MDC-rang uamangni changa sapaniko jakale GHADC-ko chalaiangchina ba gitcham MDC-rangba seokako man·piltaiode gital dake EC rikangchina didiataha.

GHADC election-o gipin jat ba rorirangni MDC chakataniko aro vote on·aniko champengchina dingtang dingtang Civil Society Organisation-ni dabie jingjengatani gimin, GHADC election-ko April jao ong·atna tik ka·giminko dontongate, ja 6-na ra·doataha aro ua re·baenggipa October jani 18 tariko bon·engaha ineba Marak parakataha. .