Tura, August 4, 2026: Danakgre A·king Nokmani demechik Amanche Ch. Marak, August 3 tariko Section 154 CrPC-ni nang·o pangchake, Tura-ni Chinap A·slang-o donggipa manderangna niamgri a·a patta-rangko suale on·anina, a·dokni Skotong Minister Conrad K.Sangma, West Garo Hills-ni Deputy Commissioner Vibhor Aggarwal, Charming N.Sangma, Chinap A·slang-ni President aro Secretary-ni kosako gnigipa changna Araimile Pulis Out Post-o badi ka·doangtaiaha.

Niam gita sakkirang baksa ia FIR-ko pulisrang register ka·na nangchongmota ine Marak janapataha.

“Angni skanggipa FIR-ko re·anggipa March jani 3 tariko Skotong Minister aro gipin manderangni kosako badi ka·aha. Uandake skanggipa aro gnigipa FIR-koba register ka·china anga mol·molatenga”.

Indake re·anggipa July 30 tariko a·dokni Skotong Minister Conrad K. Sangma, West Garo Hills-ni Deputy Commissioner, Charming N Sangma, Chinap A·slang-ni President, Secretary aro unbaksana gipinrang, Assam Schedule-ni ning·o Sixth Scheduled-ni a·a aro Nokmarangni sea-jote on·ani gri niam gita ong·gija, a·a patta-rangko gittimni manderangna su·ale on·angaha. Ia kamko, Meghalaya-ni High Court-o WP (C) No. 671 of 2025-onin mikkangchina ia a·ani gimin bichal ka·engmiting somoion manigija sualdrae on·angaha, ine Marak matnangataha.

Ian Violation of Sixth Schedule & Constitutional Rights, ba Sixth Schedule aro Constitution-ni Bilrangko Pe·e Kam Ka·ani ong·a. Sixth Schedule-ara Tribal-rang ba A·chik jatni a·arango District Council aro Traditional Heads ba Nokmarangnasa bilko on·aha. Uni gimin darangba Nokmarangni a·ako ra·seke patta on·na man·ja aro Nokmani ge·eta gri a·a patta-ko skatang sualaniara Constitution-ni niamko pe·ani ong·a. Article 244 (2)-o Sixth Schedule-na on·gimin, Tribal Land ba A·chikrangni a·ako gipin manderangna on·aniko champengani gnang.

Contempt of Court ba Court-ni Ge·etaniko manigija, Hon’ble Supreme Court, State of Haryana vs Bhajan Lal (1992 Supp (1) SCC 335)-o parakani gitade, cognizable offence-ko nike, pulisrang ia FIR-ko register ka·na bil donga aro register ka·na nangchongmota.

Hon’ble Supreme Court, Lalita Kumari vs Govt. of UP (2014) 2 SCC 1-o Section 154 CrPC-ni ning·o FIR-ko register ka·aniko mandatory dakna nangchongmota ine parakaha. Ia mamla ba case-ko Court-o bichal matchotkujaon, manigija a·a patta-rangko su·alaniara Court-ni ge·etaniko bamgijani ong·a aro bichal ka·aniko dontongatani ba champengatani ong·a.

Illegal Land Acquisition Process, ba Niamko manigija A·ako Ra·sekani, Section 4 gipa Notification-ko watahooba, Section 5A-ni ning·o dabiani aro jegalaniko lekharango seanirang donga. Section 6-ni declaration-ko dakjaha. Uni gimin a·ako acquisition ka·ani machotjaha.

A·dok sorkari a·a patta-rangko on·na maming bil dongja, District Council-sa a·a patta on·na bil donga. Uni gimin, a·dokni Skotong Minister
Conrad K. Sangma, West Garo Hills-ni Deputy Commissioner, Charming N Sangma,
Chinap A·slang-ni President aro Secretary-ni kosako ia FIR-ko IPC, CrPC, aro Contempt of Courts Act-ni kragipa Section-ni ning·o ta·rake register ka·china Marak mol·molataha.

Niam gita a·a patta sualani aro Sixth Schedule-ko chel·chakna on·gimin bilrangko pe·gipa manderangni kosako ta·rake sandirokaniko dakchina mol·molatengon, Constitution-ko pe·ani aro Court-ni ge·etaniko manigija kam ka·draanirangko niam gita, sakkirang baksa kakket bichalko ka·china
Amanche Ch Marak, Araimile Pulis Out Post-ni Officer-in-charge -ko didiangaha.