Chokpot, Sep 29, 2026: Clinton R.Marak, Sonibar salo South Garo Hills a·jani Chokpot Teksagre jolo kam ka·a matchotgija galchipe donenggipa Pradhan Mantri Gram Sadak Yojana (PMGSY) ramako nina gita re·angaha.

Ua ramako main road-oni Daji Rongkuakgre songonade, name blacktopping on·e tariangaha, indiba uni ja·mande, ramani obosta dongjajok, cement-chisa tapdape donaiaha. Indakpile contractor songni manderangko togiaha.

PMGSY Scheme-ara, dingtangmancha songadam nokadamrango songdonggipa manderangna ramarangko tarie on·china, ma·mong sorkarini ka·sae on·atgipa kam ong·achim. Maina songadam nokadamrango janggi tanggipa manderang re·a doanio ramarang namjani a·sel, mittam songrango ramarang dongjani a·sel, salanti re·ruraanio namen neng·nikanirangko chagronga.

Uni giminsa songadam nokadamrango songdonggipa manderangna on·atgipa scheme-ni kamrangko matchotgija sera bera kam ka·e galgipa contractor aro uko nirokgipa department-ni kosako Meghalaya sorkari rakgipa sinjetaniko on·na nanga aro galchipgimin kamrangko ta·rake ka·piltaichina ge·etaniko onchina Clinton Marak a·dokni Skotong Minister Conrad Sangma-ko didiataha.