Purakhasia, Sep 29, 2026 : South West Garo Hills, a·jao donggipa, Purakhasia antiko cha·na re·bagipa manderangko salbagipa mahindra pick-up bolsa, jean bosturangko gapkete gatachim, Grazing Field songo pangpileke ga·akaha, indiba rasong gnangbee manderang maming saknaa gri jokaha ine kobor man·aha.

Ua jolo songdonggipa manderang, poraigipa chatro-chatrirang, sagipa ding·giparang, an·o kegipa me·chikrang, ambulance garirang, bajar anti cha·na mikka wachini somoio ua ramako salanti re·ruraanio namen neng·nikaniko chagrongna nangenga. Ua rama namsrangjahani gimin, bang·en a·selrang ong·aha.

Political dilgiparang election changanti dal·a dal·a kattarangko aganronga, indiba election ja·mande manderangko dal·en togironga ine jolni manderang suk ong·gijaniko parakataha.

South West Garo Hills-ba Meghalaya a·dokni bakan ong·a, uni gimin pilak development-rang apsan ong·pana nanga aro namgipa ramarangko man·pana kraa, ine janapatenba, jolo songdonggipa manderang ua rama namgijako ta·raken tarie on·pachina a·dok sorkariko mol·molataha.