@GHD News@
Website:: ghdnews.in

Chokpot, Oct 25, 2025: Re·anggipa 2023 bilsio a·dok sorkarini tangka paisa chame on·gipa Chokpot Degree College-ko rikanirang namen ka·sinengani gimin Garo Students Union (GSU) Chokpot Regional Unit, suk ong·gijaniko parakataha.

GSU Chokpot Regional Unit-ni President Jish A Sangma-ni parakatani gitade, Chokpot Degree College-ko rikna sanction ka·aoni bilsigni batpilengahaoba kamrang 20 percent-ni gitasan matchotengkuani a·sel Chokpot Degree College-na ka·donge nisengpaenggipa Chokpot jolni chatro chatrirang aro songni manderang, ka·dongani gri ong·tokengaha.

“Ia College-ko rikani bidingo GSU, baditaba chang a·dokni Education Minister aro Education Department-na seachi u·iatahachim, indiba da·alonan maming namdapani aro sorkarioni aganchakaniko man·kujaenga” ine GSU President parakataha.

Adita bilsirangna skang a·dokni gitcham Education Minister Rakkam A Sangma, Chokpot-ni MLA Sengchim N Sangma baksa, ia college-ni kamrangko nieahachim. Uamang an·tangtangan ia college-ni kamrangko nieani ja·mano ku·rachakanirangko on·ahaoba sorkari aro contractor, maming namdapatanirangko dakkujaenga ine Sangma parakataha.

“Chokpot jolo ia Degree College ge·samangmangko rasong gnangbee man·ahani gimin jolni chatro chatrirang aro songni manderang kusi ong·bee ia college-o bi·sarangko poraiatna man·gnok ine ka·dongsoengachim aro ia college-on Chokpot jolo donggipa dingtang dingtang songrangoni chatro chatrirang poraina gita sengsotokenga. Indiba ia degree college-ko rikani namen ka·sinengani a·sel chatro chatrirang, Chokpot Higher Secondary skulosa poraina nangenga. Indiba ia skulo chu·onga gita classroom-rang, laboratory-rang aro dingtang dingtang nanganirang dongjani a·sel chatro chatrirang neng·nikanirangko chagrongtokenga” ineba Sangma parakataha.

Iani bidingo ta·raken ja·kurangko de·china aro ia degree college-ko ta·rake matchotatchina aro kamrangko nirokatchina GSU Chokpot Regional Unit, a·dokni Skotong Minister, Education Minister aro Chokpot-ni MLA-ko didiataha. Iani gisepon, maming ja·ku de·anirang dongjagenchim ong·ode, GSU mikkangchi rakbata ja·kurangko de·angskagen, ineba GSU President parakataha.