@ghdnews.in@

Baghmara, Jan 20, 2026: Meghalaya a·dokni Skotong Minister Conrad K Sangma, Monggolbar salo Counter-Insurgency Anti-Terrorism (CIAT) Skul aro Integrated Pulis Welfare Complex-ko, South Garo Hills a·jani Baghmara-o oprake on·angaha.

Ua CIAT-ko oprake on·ani salo a·dokni Deputy Skotong Minister Prestone Tynsong, Education Minister Lahkmen Rymbui, Director General of Police (DGP) Idashisha Nongrang, a·dokni Chief Secretary Dr Shakil P Ahammed aro gipin official-rangba dongpae bak ra•angaha.

Indake ua tom·anio Skotong Minister, jinmana aganprakengon, Baghmara-o Integrated Pulis Welfare Complex aro (CIAT) Skulko kuliahani gimin, Pulis Department an·tangni nama sikaniko on·angenba, ia project-ko a·bachengatna miksongani aro on·kangani gnang kamko ka·dilahani gimin, Inspector General of Pulis (IGP) Davis NR Marak-ko mittelangaha.

Ia project-ko matchotatna gita nangdapgipa tangka paisarangko chame on·ahani gimin, ua dingtangmancha a·dokni gitcham Home Minister aro da·o Education Minister ong·enggipa Lahkmen Rymbui-koba mittele aganangaha.

Ia CIAT Skul aro Integrated Pulis Welfare Complex-ko mongsonggipa biapo rikaniara, Meghalaya Pulisrangnasan ong·aigija, India aro gipin a·songrangoni officer-rangnaba training-rangko on·na nambegipa biap ong·enga, ineba Skotong Minister aganangaha.

Ia biaprangara dikbegipa buring bolgrim aro namen ga·nanggijagipa biap ong·ani gimin, Counter Insurgency aro Anti Terrorism skulna nambegipa biap ong·a ineba ua aganaha.

Bobil dolrangko warachakanio aro niam retirangko rakkianio nambate kamrangko ka·na man·na gita sipairangko tarianio ia biapko name jakkalchina gitaba Skotong Minister didiangaha.

Niam retirangko rakkianian sorkari mongsonggipa daitorangoni mingsa ong·a, pulisrangko mangrakbatatna gita ja·ku de·aniara, a·doko naljokani aro tom·tomanina on·gilani ong·a ine Skotong Minister parakangaha.

Ia Integrated Pulis Welfare Complex-ni bidingo talatangengon, ian pulisrangna aro uamangni nokdangrangna, uamangni kamrango pangchake, dingtang dingtang cholrangko on·na kuligipa nok ong·a ineba Skotong Minister aganangaha.

CIAT Skul-ni bidingo talatangskaengon, ian a·dokni pulis dolrangna dingtangmanchagipa training-rangko on·e, chel·chakanirangko namdapatna sorkarini ja·ku de·ani ong·a ine Sangma aganaha.

Tom·anio, a·dokni Deputy Skotong Minister Prestone Tynsong-ba jinmana aganprakengon, CIAT Skul aro Integrated Pulis Welfare Complex-ko oprake on·ahani gimin, kusi ong·aniko parakangenba, Baghmara da·ode, gipin a·jarang gitan namroro silroroani aro sorkarini nirok simsakaniko man·gnok ine aganangaha.