Ampati, June 12, 2026: Assam-oni South West Garo Hills-ona niamgri re·rurana jakkalenggipa ramrangko champengatchina, Garo Students’ Union (GSU), Western Zone (South) Ampati aro A·chik Holistic Awakening Movement (AHAM), South Western Zone, South West Garo Hills a·jani, Deputy Commissioner (DC), Anendya Raajsshre-na chitti sedoangaha. Dolgni NGO-rangni seatgipa chittio janapatani gitade, Assam aro South West Garo Hills a·jani gisepo donggipa Katuli-Kakripara, Jholgaon-Kakripara, Thakurunbari-Kakripara aro Thakurunbari-Mankachar jolrang gita niamgri re·ruraenga.

Ua ramarangkon niamgri kamrangko ka·na gita jakkalenga, je ramarangon maming check ka·ani ba nitimani dongja. Ua ramarang gitan Ita, Matchu, Do·bok aro ugita gipin mal gamrangko cha·ue badingsrukenga. Unbaksana pekatgipa ringani bosturangko badinggipa aro bol cha·ugipa manderangna ua ramarangan joke katna ba batsotna jakkalrongenga, ineba NGO-rang parakataha.

Cha·ugipa manderang bang·a changon, A·chik a·songni mal-gamrang, jedake Mobile Tower Battery-rang, Pumping Motor-rang, Generator-rang aro gipin nokni bosturangko cha·ue ua rama gitan joke katna gita cholko man·enga, ine NGO-rang janapataha.

Uni gimin, niamgri re·rurana jakkalenggipa ramarangko champengatchina aro Assam-oniko SWGH-ona salruraenggipa garirangna aro bostu salgipa garirangna Entry, Exit point-rangko donchina aro nangchongmotgipa rama bibrarango pulis aro forest check gate-rangko chu·onga gita dondapchina, GSU aro AHAM South Western Zone, dabiangaha.