Selsella, Sep 29, 2026: West Garo Hills aro South West Garo Hills a·jani pilak chatro chatrirang medical education ba sanna bannani a·bao skie ra·na sike dongenggiparangna NEET (National Eligibility cum Entrance Test) porikkana jotton ka·enggiparang koros nanggija ba indin coaching class-ko on·na sienga, ine All Selsella NGOs Alliance (ASNA) u·iataha.

Ia free coaching class-ko koros nanga gri on·na sak 50 chatro chatrirangko entrance porikkako ra·e seokaniko dakgen. Jemangan koros nanggija NEET coaching program-na gisiko nanggiparang ia entrance porikkao bak ra·epachina ASNA didiataha.

Entrance porikkako 2026, November 2 tarik pringni 10:07 bajio Selsella Govt UP Skulo ong·atgen aro uamangoniko free coaching-ko on·na sak 50 chatro chatrirangko seokgen ine ASNA parakataha.

Ia entrance porikkao bak ra·na gisiko nanggiparang science stream-o class XII (12)-ko pass ka·gipa ong·na nanggen, unbaksana 40% marks gapgipa chatro chatrirang, dorgasto galna gita, West Garo Hills ba South West Garo Hills a·jaoni ong·na nanggen aro NEET-na gisiko nanggiparang ong·na nanggen ine ASNA u·iataha.

Jemangan koros nanga gri NEET coaching class-o bak ra·na sikgiparang, October 30 tarikna skang dorgastoko galna nanggen ineba u·iataha.

Gisiko nanggipa chatro chatrirang selsella.ngos@gmail.com email address-ona dorgastoko galatna man·gen aro talbate ma·sina sikode, 9863040213 phone number-ona call ka·e sing·atna man·gen.

All Selsella NGOs Alliance, koros gri NEET coaching class-ko ra·na sikgiparang chong·motan West Garo Hills aro South West Garo Hills a·jani chatro chatrirang NEET-na tarisamsoenggiparangko ia entrance porikkao bak ra·pachina mol·molataha.