Baghmara, Sep 30, 2026: South Garo Hills-ni nangrimgimin dingtang dingtang NGO-rang jekai FKJGP, AYWO, ADE, AHAM, NGCO, APA, ADIL Southern Zone, re·baenggipa October 14 tariko dal·begipa re·jomaniko ong·atna tik ka·aha.

NGO-rangni October 14 tariko dal·begipa rally-ko ong·atna tik ka·ani miksongara, National Highway (NH)-62 rama jekon da·o NH-217 ine mingjitshachim, rama namsrangjahani gimin, ta·rakale tarie on·china dabienba, re·anggipa September-ni 2 aro 3 tarikrango Non Cooperation Movement (NCM)-ko ong·atani gisepon, a·dok sorkari maming aganchakaniko on·jaha. Uni ja·mano agangrikaniko dakchina NGO-rang sorkarina sal 15 somoiko on·taiahachim, indiba a·dok sorkari namrenge maming agangrikaniko on·jaha.

Uandake NGO-rangni dabianirangko knachaktelgija dongani gimin, September-ni 24 aro 25 tarikrangoba gnigipa changna NCM-ko ong·attaiaha. Indiba da·alona kingkingba a·dok sorkari maming aganchakaniko on·kujaengani gimin, re·baenggipa October 14 tariko dal·begipa re·jomaniko ong·atangskana NGO-rang tik ka·aha.

A·dok sorkari maini gimin South Garo Hills-ko watchangenga aro manderangni neng·nikanirangko maina ma·sichakjaenga ine NGO-rang sing·doatenba, maimanchana South Garo Hills-ni dilsamangmang NH-62 (217) ramako tarie on·na gisiko nangjaenga. Gipin a·jarangni ramarangkode name tarimanaha, indiba South Garo Hills-ni ramakode tarigija galchipe donenga. South Garo Hills-ba Meghalaya a·dokni bakan ong·achim, ine NGO-rang suk ong·gijaniko parakataha.

Unbaksana, South Garo Hills District Administration-ni NH-62 (217) ramani proposed reduction, Right of Way (RoW)-ko miter 24-oniko miter 18-ona komiatani giminba NGO-rang raken jegalataha.

“Chingni dabianirangko knachakkuja dipetna jingjengataniko dontongjawa, ‘No Roads, No Rest” ine NGO-rang parakataha